Երբ գա այդ կետը, որ ընտրությունը վերջնական լինի ու անխուսափելի, կկայացվի որոշում․ Փաշինյանը ԵՄ-ի ու ԵԱՏՄ-ի միջև ընտրության մասին
1 րոպեի ընթերցում
Հայաստանի վարչապետ Նիկոլ Փաշինյանը չի բացառել Հայաստանի՝ ԵԱՏՄ-ից դուրս գալու հնարավորությունը։
«Արմենպրես»-ի հաղորդմամբ՝ լրագրողների հետ ճեպազրույցում նա հիշեցրել է, որ ՀՀ-ն ԵՄ-ին անդամագրվելու գործընթաց սկսելու օրենքի ընդունումից հետո հայտարարել է, որ Եվրամիությանը և ԵԱՏՄ-ին անդամակցումը միաժամանակ հնարավոր չէ։
«Երբ գա այդ կետը, որ ընտրությունը վերջնական լինի ու անխուսափելի, մենք կկայացնենք համապատասխան որոշում»,-ասաց վարչապետը։
Նա նաև նշեց, որ այդ հնարավորությունը կախված է ժողովրդի կամքից, ընթացիկ իրավիճակներից, բանակցային գործընթացներից, ինչպես նաև իրադրության, հնարավորությունների ու այլընտրանքների վերլուծությունից։
Հայաստանի խորհրդարանը 2025 թվականի մարտին ընդունել է Եվրամիությանն անդամակցության գործընթաց սկսելու մասին օրենք։ Դրանից հետո ՌԴ պաշտոնյաները մի քանի անգամ հայտարարել են, որ Եվրամիությանն ու Եվրասիական տնտեսական միությանը միաժամանակ անդամակցելը հնարավոր չէ, և Հայաստանը պետք է ընտրություն կատարի երկու կառույցների միջև։