ՌԴ-ն առաջարկել է բարձրացնել պատվիրակությունների ղեկավարների մակարդակն Ուկրաինայի հետ բանակցություններում
2 րոպեի ընթերցում
Ռուսաստանն առաջարկել է բարձրացնել Ուկրաինայի հետ բանակցություններում պատվիրակությունների ղեկավարների մակարդակը։ «Արմենպրես»-ի փոխանցմամբ՝ այս մասին մամուլի ասուլիսում հայտարարել է ՌԴ արտաքին գործերի նախարար Սերգեյ Լավրովը։
«Նախագահ Թրամփի հետ երեկ չէ առաջին օրվա (խմբ.՝ օգոստոսի 18-ի) հեռախոսազրույցից հետո մեր նախագահն առաջարկ արեց ոչ միայն շարունակել այս բանակցությունները, այլև մտածել պատվիրակությունների ղեկավարների մակարդակի բարձրացման մասին։ Եվ սա լիովին համապատասխանում է մեր առաջարկին, որը ես հենց նոր նշեցի, որ այս գործընթացի շրջանակներում առանձին բլոկ պետք է հատկացվի կարգավորման քաղաքական ասպեկտների ուսումնասիրությանը՝ ռազմական և մարդասիրական ասպեկտների հետ մեկտեղ», - Լավրովի խոսքերն է մեջբերում ՏԱՍՍ-ը։
Նա նաև նշել է, որ Ռուսաստանը պատրաստ է Ուկրաինայի շուրջ բանակցությունների ցանկացած ձևաչափի, սակայն բարձր մակարդակի հանդիպումներն անհրաժեշտ է հանգամանորեն նախապատրաստել բոլոր նախորդող փուլերում:
«Բոլոր հանգամանքներում, ինչպես արդեն ասացի, մենք պատրաստ ենք ցանկացած ձևաչափի, բայց երբ խոսքը վերաբերում է բարձր մակարդակի հանդիպմանը, անհրաժեշտ է ամենահանգամանալից կերպով այն նախապատրաստել բոլոր նախորդող փուլերում, որպեսզի գագաթնաժողովները չվերածվեն իրադրության վատթարացման, այլ իրականում վերջ տան խնդրին այն բանակցություններում, որոնք մենք պատրաստ ենք շարունակել», - ասել է նա: