3 րոպեի ընթերցում
Հայաստանն ու Իրանը սահմանին երկրորդ կամուրջ կառուցելու համաձայնություն են ձեռք բերել:
«Արմենպրես»-ի փոխանցմամբ՝ Իրանի նախագահ Մասուդ Փեզեշքիանի հետ մամուլի համար հայտարարությունների ժամանակ այս մասին հայտնեց ՀՀ վարչապետ Նիկոլ Փաշինյանը:
Փաշինյանը հիշեցրեց, որ Հայաստանն ու Իրանը ռազմավարական ուղենիշ են սահմանել՝ երկկողմ առևտրաշրջանառության ծավալները հասցնելու նախ 1, ապա 3 մլրդ դոլարի:
«Կարող ենք արձանագրել, որ փաստացի մոտեցել ենք 1 մլրդ-ի ուղենիշին և հետևողականորեն աշխատում ենք հաջորդ թիրախին հասնելու ուղղությամբ: Այս իմաստով ԵԱՏՄ անդամ պետությունների և Իրանի միջև ուժի մեջ մտած ազատ առևտրի համաձայնագիրը նոր հնարավորություններ է ընձեռում երկու երկրների գործարարների համար»,-ասաց վարչապետը:
Ակտիվ քաղաքական երկխոսությանը զուգահեռ, Իրանի հետ Հայաստանի փոխգործակցությունն ընդգրկում է բազմաթիվ այլ բնագավառներ՝ տնտեսական, ենթակառուցվածքային, էներգետիկ, առողջապահական, մշակութային, բնապահպանական և այլն, որոնցից յուրաքանչյուրում կողմերը տարեցտարի սահմանում են նոր հորիզոններ:
Վարչապետը նշեց՝ Հայաստանի և Իրանի միջև առկա ենթակառուցվածքային մի շարք ծրագրեր արդեն իսկ թևակոխել են գործնական փուլ: Այդ ծրագրերը ռազմավարական նշանակություն ունեն Հայաստանի համար: Դրանցից է, օրինակ, Քաջարան-Ագարակ 32 կմ ճանապարհային հատվածը, որի շինարարությունը հայկական կողմը վստահել է իրանական ընկերությանը: Փաշինյանը համոզմունք հայտնեց, որ ճանապարհը շահագործման կհանձնվի սահմանված ժամկետում:
«Հաշվի առնելով մեր պետությունների միջև օրեցօր աճող փոխադրումների ծավալը՝ համաձայնություն ենք ձեռք բերել Հայաստան-Իրան սահմանին երկրորդ կամուրջ կառուցելու վերաբերյալ»,-ասաց Փաշինյանը:
Փաշինյանն ու Փեզեշքիանը քննարկել են նաև էներգետիկ ոլորտի ընթացիկ կարևորագույն՝ Հայաստան-Իրան էլեկտրահաղորդման 3-րդ գծի նախագիծը: Երկու երկրներն ունեն հստակ փոխըմբռնում, որ նախագիծը պետք է հնարավորինս սեղմ ժամկետներում ավարտվի: Երրորդ գծի շահագործման շնորհիվ Հայաստանը կկարողանա ավելի շատ էլեկտրաէներգիա արտահանել Իրան:
Վարչապետը վերահաստատեց, որ Հայաստանը չափազանց կարևորում է Իրանի հետ ռազմավարական բնույթի հարաբերությունները: