Արաղչին Ռուսաստանի ԱԳ նախարարի ներկայացուցչի հետ քննարկել է վերջին զարգացումները Հարավային Կովկասում

Իրանի արտաքին գործերի նախարար Աբբաս Արաղչին Թեհրանում ընդունել է Ռուսաստանի արտգործնախարարի հատուկ ներկայացուցիչ Իգոր Խովաևին։ Ինչպես հաղորդում է «Արմենպրես»-ը՝ վկայակոչելով իրանական Mehr լրատվական գործակալությունը, քննարկման առանցքում եղել են վերջին զարգացումները Հարավային Կովկասում։ 

Արաղչին շեշտել է երկու երկրների միջև խորհրդակցություններն ու համագործակցությունը շարունակելու ու ամրապնդելու անհրաժեշտությունը՝ պաշտպանելու ընդհանուր շահերը։

Անդրադառնալով Հայաստանի և Ադրբեջանի միջև խաղաղության հաստատման գործընթացին աջակցելու հարցում Իրանի սկզբունքային դիրքորոշմանը՝ Արաղչին ընդգծել է տարածաշրջանում խնդիրների խաղաղ կարգավորման անհրաժեշտությունը, ինչպես նաև տարածաշրջանային խնդիրները լուծելու հարցում տարածաշրջանային մեխանիզմների, ինչպիսին է 3+3 ձևաչափը, կարողություններն օգտագործելու կարևորությունը՝ հանուն Հարավային Կովկասում կայունության և անվտանգության ապահովման։

Իգոր Խովաևն իր հերթին ներկայացրել է Ռուսաստանի դիվանագիտական ջանքերը Հարավային Կովկասում խաղաղություն հաստատման ուղղությամբ և շեշտել Թեհրանի և Մոսկվայի միջև սերտ փոխգործակցության, շարունակական խորհրդակցությունների և համակարգման կարևորությունը: