Երևանի և Բաքվի միջև խաղաղության հաստատումը կարևոր ձեռքբերում է միջազգային դիվանագիտության համար. ԱՄՆ պետքարտուղարություն
3 րոպեի ընթերցում
Հայաստանի և Ադրբեջանի միջև հռչակագրի ստորագրումը կարևոր ձեռքբերում է միջազգային դիվանագիտության համար, որին կարողացավ հասնել ԱՄՆ նախագահ Դոնալդ Թրամփը։ «Արմենպրես»-ի փոխանցմամբ՝ այս մասին ճեպազրույցում հայտնել է ԱՄՆ պետքարտուղարության խոսնակ Թեմի Բրյուսը։
«Հայաստանի և Ադրբեջանի միջև խաղաղության հռչակումը վերահաստատել է այն, որ նախագահ Թրամփն իսկապես խաղաղության նախագահ է։ Անցյալ շաբաթ նա Հայաստանի և Ադրբեջանի առաջնորդներին հյուրընկալեց Սպիտակ տանը, որտեղ նրանք ստորագրեցին խաղաղության պատմական համատեղ հռչակագիր՝ տասնամյակներ տևած ծանր հակամարտությունից և մեծ թվով մարդկային կորուստներից հետո, ինչը միջազգային դիվանագիտության համար նշանակալի նվաճում է և բռնության դադարեցում, որը միայն նախագահ Թրամփը կարող էր իրականացնել», - հայտարարել է Պետքարտուղարության խոսնակը։
Բրյուսը հիշեցրել է, որ վարչապետ Նիկոլ Փաշինյանը և նախագահ Իլհամ Ալիևն օգոստոսի 8-ին նաև երկկողմ տնտեսական համաձայնագրեր են ստորագրել Միացյալ Նահանգների հետ՝ «բացելով Հարավային Կովկասի տարածաշրջանի մեծ ներուժը առևտրի, տարանցման, էներգետիկայի, ենթակառուցվածքների և տեխնոլոգիաների ոլորտներում և ստեղծելով նոր հնարավորություններ ամերիկյան ժողովրդի և ամերիկյան բիզնեսի համար»։
Պետքարտուղարության ներկայացուցչին նաև խնդրել են մեկնաբանել Իրանից և Ռուսաստանից հնչող հայտարարությունները, որոնք «չեն աջակցում խաղաղության այս պլանին»։
«Աշխարհը գիտի, որ նախագահ Թրամփին պետք է լուրջ ընդունել։ Այդ պայմանավորվածությունը, այս համաձայնագիրը կարևոր է նրա համար։ Նրանք (խմբ.՝ Հայաստանի և Ադրբեջանի ղեկավարները) Սպիտակ տանն էին։ Սա կարևոր է վարչակազմի համար։ Սա կարևոր է աշխարհի համար», - նշել է Թեմի Բրյուսը։
Նա շեշտել է, որ ինչպես եվրոպացիները, ֆրանսիացիները, այնպես էլ ՌԴ նախագահ Վլադիմիր Պուտինը և նույնիսկ ԱՄՆ նախկին նախագահ Ջո Բայդենը փորձել են լուծել տասնամյակներ տևած հակամարտությունը, սակայն «միայն նախագահ Թրամփն է կարողացել այս երկու երկրներին հաջողությամբ բերել այս պատմական խաղաղությանը»։
«Այնպես որ, կարծում եմ՝ աշխարհը գիտի, որ նա հանձնառու է երկրների միջև երկարատև, կայուն խաղաղությանը՝ անկախ նրանից, թե որքան են տևել հակամարտությունները կամ թշնամանքը», - ասել է խոսնակը՝ հավելելով, որ Թրամփը կանի այն ամենն, ինչ անհրաժեշտ է պատերազմները դադարեցնելու համար։