3 րոպեի ընթերցում
Հայաստանի և Ադրբեջանի միջև խաղաղության համաձայնագրի նախաստորագրումը ճանապարհ կհարթի երկրների միջև տասնամյակներ տևած հակամարտությանը վերջ դնելու համար և կբացի նոր դարաշրջան՝ հիմնված միմյանց ինքնիշխանության և տարածքային ամբողջականության նկատմամբ լիակատար հարգանքի վրա։ «Արմենպրես»-ի փոխանցմամբ՝ Սպիտակ տանն ԱՄՆ նախագահ Դոնալդ Թրամփի և Ադրբեջանի նախագահ Իլհամ Ալիևի հետ կայացած եռակողմ հանդիպմանն այս մասին ասել է ՀՀ վարչապետ Նիկոլ Փաշինյանը։
«Այսօր մենք հասել ենք կարևոր հանգրվանի Հայաստան-Ադրբեջան հարաբերություններում։ Մենք անցյալում ունեցած պատմությունից ավելի լավ պատմություն գրելու համար հիմքեր ենք դնում։ Այս բեկումնային առաջընթացը պարզապես հնարավոր չէր լինի առանց նախագահ Թրամփի անձնական ներգրավվածության և մեր տարածաշրջանում խաղաղության նկատմամբ նրա վճռական հանձնառության։
Այսօրվա հռչակագրերը, որոնք անձամբ կստորագրի նաև նախագահ Թրամփը, վստահություն և երաշխիք են տալիս առ այն, որ մենք Հարավային Կովկասում բացում ենք խաղաղության, բարգավաճման, անվտանգության և տնտեսական համագործակցության էջը։ Թույլ տվեք ընդգծել տարածաշրջանում տրանսպորտային հաղորդակցությունների բացման մասին համաձայնագիրը՝ հիմնված ինքնիշխանության, տարածքային ամբողջականության և իրավազորության սկզբունքների վրա։ Ես հատկապես ուրախ եմ, որ ԱՄՆ-ի հետ միասին Հայաստանը կաշխատի կյանքի կոչելու «Թրամփի ուղին խաղաղության և բարեկեցության համար» (TRIPP) կապակցման նախագիծ, որը կապաշրջափակի ողջ տարածաշրջանը։ TRIPP-ը կբացի ռազմավարական տնտեսական հնարավորություններ, որոնք կբերեն երկարաժամկետ օգուտներ։ Այն կնպաստի ենթակառուցվածքային ներդրումներին, կխթանի տարածաշրջանի կապակցվածությունը և կամրապնդի ԱՄՆ-ի՝ որպես հակամարտությունների լուծման կարևոր դերակատարի առաջատարությունը։ Ցանկանում եմ շնորհակալություն հայտնել նախագահ Թրամփին և նրա թիմին Հայաստանի և Ադրբեջանի միջև հարաբերությունների ողջ իրողությունը փոխակերպող այս արդյունքին հասնելու գործում ունեցած միջնորդական դերակատարման համար։ Սա լրջագույն գործարք է, սա հաջողություն է մեր երկրների և տարածաշրջանի համար և հաջողություն աշխարհի համար, քանի որ ավելի խաղաղ տարածաշրջանը նշանակում է ավելի անվտանգ աշխարհ։ Մեկ նախադասությամբ սա կարելի է բնութագրել հետևյալ կերպ՝ ուժ, որը հանգեցնում է խաղաղության»,- ասել է ՀՀ վարչապետը։
Դիմելով ԱՄՆ նախագահին՝ ՀՀ վարչապետն ասել է, որ այսօրվա մեծ նվաճումը հերթական անգամ վկայում է նրա համաշխարհային առաջնորդության և համաշխարհային ասպարեզում պետական գործչի և խաղաղարարի՝ նրա ունեցած պատմական դերակատարման մասին։ «Խաղաղություն հաստատելու համար անհրաժեշտ է տեսլական, քաղաքական խիզախություն և վճռականություն, իսկ ամենակարևորն այն է, որ դա անելու համար անհրաժեշտ է հավատ գործի նկատմամբ»,- նշել է ՀՀ վարչապետը։