Թաիլանդում Կամբոջայի հարվածների հետևանքով քաղաքացիական զոհերի թիվը հասել է 11-ի

Թաիլանդի առողջապահության նախարարը հայտնել է, որ Կամբոջայի հետ սահմանային լարվածության արդյունքում թաի քաղաքացիական անձանց շրջանում զոհերի թիվը հասել է 11-ի։ «Արմենպրես»-ի փոխանցմամբ, այս մասին հայտնում է Reuters-ը։

Նախարար Սոմսակ Թեփսութինը դատապարտել է Կամբոջայի հարձակումը հիվանդանոցի վրա՝ նշելով, որ նմանօրինակ գործողությունները պատերազմական հանցանքներ են ու դրանք համար պետք է պատասխանատվության ենթարկել։ Նա կոչ է արել դադարեցնել բռնությունը։ 

Թաիլանդի ԱԳՆ-ն ավելի վաղ հայտարարություն էր տարածել այն մասին, որ Կամբոջայից ծանր հրետանային հարվածներ են հասցվել թաիլանդական ռազմական բազաների վրա, ինչպես նաև թիրախավորվել են քաղաքացիական բնակության վայրեր, այդ թվում և հիվանդանոց։ 

Արտաքին քաղաքական գերատեսչությունից մեղադրել են Կամբոջային սահմանային հատվածներում ականներ տեղադրելու մեջ, ինչի հետևանքով վերջին օրերին ուժել էին Թաիլանդի բանակի ներկայացուցիչները։ ԱԳՆ-ից հայտնել էին նաև Կամբոջայում իրենց դեսպանին հետ կանչելու մասին՝ խնդրելով այդ երկրին համապատասխանաբար հետ կանչել Թաիլանդում իրենց դեսպանին։

Կամբոջայի և Թաիլանդի միջև վեճն ավելի քան հարյուր տարվա պատմություն ունի և սկսվել է այն պահից, ինչ երկու երկրների միջև ֆրանսիական օկուպացիայից հետո գծվել են սահմանները։ Իրավիճակը լարվել էր 2008 թվականին, երբ Կամբոջան փորձեց վիճարկելի տարածքում գտնվող 11-րդ դարի տաճարը գրանցել որպես ՅՈՒՆԵՍԿՕ-ի Համաշխարհային ժառանգության վայր։ Այս քայլը լուրջ դիմադրության արժանացավ Թաիլանդի կողմից։

Տարիների ընթացքում կողմերի միջև ժամանակ առ ժամանակ վերսկսված բախումները զոհերի պատճառ են դարձել երկու կողմերում էլ։  

Վերջին երկու ամսում երկրները սահմանային սահմանափակումներ էին սահմանել մեկը մյուսի համար։ Կամբոջան արգելել էր Թաիլանդից այնպիսի ապրանքների ներմուծումը, ինչպիսիք են մրգերն ու բանջարեղենները, ինչպես նաև դադարեցրել էր էլեկտրաէներգիայի և համացանցի ծառայությունների ներմուծումը։ 

Վերջին շաբաթներին երկու երկրներն ուժեղացրել էին զինված ներկայությունը սահմաններին։