Մոսկվան ցանկանում է հասկանալ, թե ինչ է կանգնած Թրամփի սահմանած վերջնաժամկետի հետևում. Լավրով

Մոսկվան ցանկանում է հասկանալ, թե ինչ է թաքնված ԱՄՆ նախագահ Դոնալդ Թրամփի՝ Ուկրաինայում իրավիճակի կարգավորման համար 50-օրյա ժամկետի սահմանման մասին հայտարարության հետևում։ «Արմենպրես»-ի փոխանցմամբ՝ այս մասին հայտարարել է ՌԴ արտգործնախարար Սերգեյ Լավրովը Շանհայի համագործակցության կազմակերպության (ՇՀԿ) արտաքին գործերի նախարարների խորհրդի նիստից հետո կայացած մամուլի ասուլիսում։

«Մենք ուզում ենք հասկանալ, թե ինչ է թաքնված այս հայտարարության հետևում՝ 50 օր։ Նախկինում եղել է նաև 24 ժամ, նաև 100 օր։ Մենք այդ ամենը տեսել ենք և իսկապես ուզում ենք հասկանալ, թե ինչով է առաջնորդվում ԱՄՆ նախագահը», - Լավրովի խոսքերն է մեջբերում «ՌԻԱ Նովոստի» գործակալությունը։

Ռուսաստանի արտաքին գործերի նախարարը նաև ասել է, որ Ռուսաստանը պատրաստ է նոր պատժամիջոցների, հաղթահարում է պատժամիջոցները և չի կարծում, որ իր գործընկերները կհրաժարվեն իրենց առևտրային պարտավորություններից։

ՌԴ ԱԳ նախարարը հավելել է, որ իր կարծիքով՝ Թրամփը «գտնվում է Եվրամիության և ՆԱՏՕ-ի ներկայիս ղեկավարության կողմից հսկայական, ես կասեի՝ անպարկեշտ ճնշման տակ», որոնք աջակցում են Ուկրաինայի նախագահի պահանջներին՝ ժամանակակից զենքերով զինելու Ուկրաինան։

Ռուսաստանի արտաքին գործերի նախարարը նաև ասել է, որ ԱՄՆ-ն գիտի Ստամբուլում Ուկրաինայի հարցով բանակցություններում Ռուսաստանի դիրքորոշումը, և Մոսկվան ստամբուլյան բանակցությունների ձևաչափը սպառված չի համարում։ Ըստ Լավրովի՝ Կիևի հայտարարությունները, թե այդ ձևաչափը սպառվել է, ցույց են տալիս համաձայնություն ձեռք բերելու Կիևի ցանկության բացակայությունը։

Հուլիսի 14-ին Սպիտակ տանը ՆԱՏՕ-ի գլխավոր քարտուղար Մարկ Ռյուտեի հետ հանդիպման ժամանակ Դոնալդ Թրամփը հայտարարել է, որ Ռուսաստանի ղեկավարությանը 50 օր է տալիս Ուկրաինայի հետ խաղաղության համաձայնագրի հասնելու համար։ Հակառակ դեպքում, ԱՄՆ նախագահը սպառնացել է Ռուսաստանի առևտրային գործընկերների նկատմամբ 100%-ի չափով երկրորդային մաքսատուրքեր կիրառել։ Թրամփը նաև հաստատել է ՆԱՏՕ-ի միջոցով Ուկրաինա Patriot հակաօդային պաշտպանության համակարգեր ուղարկելու ծրագրերը։