2 րոպեի ընթերցում
Իրանական միջուկային օբյեկտներին հասցված ԱՄՆ-ի հարվածները, թեև անարդյունավետ են եղել, հող են ստեղծում հակամարտությունն ամբողջ Մերձավոր Արևելքում տարածելու համար: ԱՄՆ-ն, գրոհելով Իրանի միջուկային օբյեկտների վրա, անմիջականորեն հակամարտության մեջ է մտել իսլամական հանրապետության հետ: Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտարարել է Իրանի զինված ուժերի կենտրոնական շտաբի՝ «Խաթամ ալ Անբիա»-ի պաշտոնական ներկայացուցիչը:
«Այս թշնամական գործողությունն անհրաժեշտ էր մեռնող սիոնիստական ռեժիմի վերածնման համար, բայց այն ոչ միայն արդյունք չտվեց, այլև ընդլայնեց Իրանի Իսլամական Հանրապետության զինված ուժերի օրինական թիրախների ցանկը և հող ստեղծեց տարածաշրջանում պատերազմի տարածման համար», - ասել է նա Իրանի պետական հեռուստառադիոընկերության եթերում:
«Հանցագործ Ամերիկան, շարունակելով բազմակողմանի օգնություն ցուցաբերել սիոնիստական ռեժիմի ագրեսիային, ակնհայտորեն խախտելով Իրանի Իսլամական Հանրապետության ինքնիշխանությունը, անմիջական պատերազմի մեջ է մտել Իրանի հետ և հարձակվել Իրանի սրբազան հողի վրա», - հավելել է նա:
Լույս հունիսի 13-ի գիշերը Իսրայելը զանգվածային հարվածներ է հասցրել Իրանին։ Գործողության հայտարարված նպատակն էր խափանել Թեհրանի աշխատանքը միջուկային ծրագրի վրա։ Ի պատասխան՝ իրանական կողմը սկսել է հարվածներ հասցնել Իսրայելի տարածքին։ Հունիսի 22-ին ԱՄՆ-ն ուղղակիորեն ներգրավվել է հակամարտության մեջ՝ հարվածներ հասցնելով Իրանի երեք միջուկային օբյեկտներին։