2 րոպեի ընթերցում
Ռուսաստանի արտաքին գործերի նախարար Սերգեյ Լավրովը և Եգիպտոսի արտաքին գործերի նախարար Բադր Աբդել Աթին հեռախոսազրույցի ժամանակ դեմ են արտահայտվել Իրանի և Իսրայելի միջև հակամարտության սրմանը։
Ինչպես հաղորդում է «Արմենպրես»-ը, վկայակոչելով «ՏԱՍՍ»-ը, այս մասին ասվում է Ռուսաստանի արտաքին գործերի նախարարության կայքում տեղադրված հայտարարության մեջ։
«Նախարարները խորը մտահոգություն հայտնեցին Իսրայելի կողմից Իրանի դեմ ձեռնարկված ռազմական գործողությունների վերաբերյալ, որոնք խախտում են ՄԱԿ-ի կանոնադրությունը և միջազգային իրավունքը։ Արտաքին քաղաքականության գերատեսչությունների ղեկավարները հանդես եկան ռազմական գործողությունների անհապաղ դադարեցման և այն քայլերից հրաժարվելու օգտին, որոնք կարող են հանգեցնել զինված դիմակայության հետագա սրմանը և հակամարտության գոտու ընդլայնմանը՝ անխուսափելի բացասական հետևանքներով ամբողջ տարածաշրջանի համար»,-ասվում է հաղորդագրության մեջ։
ՌԴ արտաքին գործերի նախարարությունը նշում է, որ եգիպտական կողմը բարձր է գնահատել Ռուսաստանի պատրաստակամությունը՝ անհրաժեշտ միջնորդական ջանքեր գործադրելու ճգնաժամի քաղաքական և դիվանագիտական կարգավորման նպատակով։
Իսրայելի և Իրանի միջև փոխադարձ հարվածները շարունակվում են արդեն հինգերորդ օրը։ Ավելի վաղ Իրանի իշխանությունները հայտնել են իսրայելական հարվածներից 220-ից ավելի զոհի մասին, որոնց մեծ մասը քաղաքացիական անձինք են։ Իսրայելը հայտնել է իրանական պատասխան հարվածներից 24 զոհի մասին։