Երևանի մշակութային օջախների 300 սաների կատարմամբ կայացել է Մանսուրյանի «Խաղիկներ» խմբերգային ստեղծագործության համաշխարհային բեմելը
1 րոպեի ընթերցում
Ալեքսանդր Սպենդիարյանի անվան օպերայի և բալետի ազգային ակադեմիական թատրոնում կայացել է Երևանի քաղաքապետարանի երաժշտական և արվեստի դպրոցների 16-րդ մրցույթ-փառատոնի հաղթողների պարգևատրման հանդիսավոր արարողությունը։
Ինչպես «Արմենպրես»-ին տեղեկացրին Երևանի քաղաքապետարանից, գալա համերգի ընթացքում ելույթ է ունեցել Երևանի երաժշտական և արվեստի դպրոցների շուրջ 300 սովորողներից կազմավորված հավաքական երգչախումբը: Խմբավար Նարինե Ոսկանյանի ղեկավարությամբ հավաքական երգչախումբը կատարել է մեծանուն կոմպոզիտոր, ՀՀ ժողովրդական արտիստ Տիգրան Մանսուրյանի նոր՝ «Խաղիկներ» խմբերգային ստեղծագործությունը:
Ըստ աղբյուրի՝ Երևանի քաղաքապետարանի հատուկ պատվերով ստեղծված կոթողային աշխատությունը նոր խոսք է հայկական խմբերգային արվեստում: Մանկապատանեկան երգչախմբի կազմի համար գրված ստեղծագործությունում, որի ժանրին, ի դեպ, կոմպոզիտորն անդրադառնում է առաջին անգամ, օգտագործված են տարբեր ժամանակահատվածների ժողովրդական բանահյուսության նմուշները (ժողովրդական աղոթքներ, խաղիկներ, հայրեններ և այլն):
Ըստ աղբյուրի՝ գալա համերգի ընթացքում կայացել է նաև խմբերգաշարի գրքի շնորհանդեսը, որը նույնպես իրականություն է դարձել է Երևանի քաղաքապետարանի նախաձեռնությամբ և պատվերով: