Լավրովը պնդում է, որ ՌԴ-ի կողմից Հայաստանին չմատակարարված զենքի հարցը կարգավորվել է
3 րոպեի ընթերցում
Արարատ Միրզոյանն ու Սերգեյ Լավրովը մայիսի 21-ին Երևանում քննարկել են պայմանագրով հաստատված, բայց այդպես էլ ՀՀ-ին չմատակարարված զենք-զինամթերքի հարցը: «Արմենպրես»-ն այս մասին տեղեկացավ Հայաստանի և Ռուսաստանի ԱԳ նախարարների համատեղ մամուլի ասուլիսի ժամանակ Սերգեյ Լավրովի հայտարարությունից:
Լրագրողի հարցին, որ Ռուսաստանը զենք չի մատակարարել Հայաստանին, չնայած դրա դիմաց Հայաստանը վճարել է՝ ՌԴ ԱԳ նախարար պատասխանեց.
«Մենք այդ դրվագն այսօր քննարկել ենք, կարգավորել ենք այդ հարցը: Այդ վճարումները հաշվանցվել են ալ նպատակների, այստեղ հակասություն չկա: Մատակարարումների առումով կարող եմ ասել՝ Ռուսաստանը հիմա ունի իրավիճակ, որով պայմանավորված՝ ստիպված ենք կռվել ամբողջ Եվրոպայի դեմ: Գործնականում, եվրոպական երկրներից Ուկրաինա հասնող զենքը շատ է, ժամանակակից զենք է, և այդ զենքը մեր պատասխանն է պահանջում: Համոզված եմ՝ մեր հայ բարեկամները մեզ հասկանում են, գիտեն, որ նման իրավիճակներում մենք չենք կարող մեր բոլոր պարտավորությունները ժամկետում կատարել: Բայց անգամ այդ իրավիճակում հայ գործընկերների հետ պայմանագրերով նախատեսված համակարգերը փոխանցվում են և մենք այդ պրակտիկան կշարունակենք»:
Անդրադառնալով հարցին, որ հատկապես այդ պարագայում Ռուսաստանը չպետք է ընդդիմանա Հայաստանի՝ այլ երկրներից, այդ թվում՝ Եվրոպայից զենք-զինամթերք ձեռքբերելուն,Սերգեյ Լավրովը երկիմաստ պատասխան տվեց.
«Որևէ խնդիր չկա, դա մեր հայ բարեկամների ընտրությունն է: Եթե իրենք ցանկանում են ունենալ ֆրանսիական կամ այլ երկրի բազա՝ լրացուցիչ մատակարարների համար, խնդրեմ, մենք որևէ բան չենք պարտադրելու: Մեր դաշնակիցներն իրենք պետք է որոշեն, թե որտեղ է ավելի լավ զենք գնել: Նույնիսկ՝ այն ամենով հանդերձ, ինչ ես քիչ առաջ ասեցի»,- վստահեցրեց ՌԴ ԱԳ նախարարը՝ չմոռանալով հիշեցնել, որ Ֆրանսիան Ռուսաստանի համար, մեղմ ասած, բարեկամ երկիր չէ:
Սերգեյ Լավրովի խոսքով՝ հայ-ռուսական գործընկերային հարաբերությունները, ինչպես նախկինում, հիմա էլ շատ ջերմ են՝ ի հեճուկս մի շարք խնդիրների, որոնք ծագեցին հարաբերություններում, թերևս, միմյանց դիրքորոշումները ոչ լիարժեք հասկանալու պատճառով: