365.95
Ալեն Սիմոնյանը վստահ է, որ Կիպրոսն իր ներդրումը կունենա Հայաստանի և Ադրբեջանի միջև խաղաղության հաստատման ճանապարհին
2 րոպեի ընթերցում
Հայաստանի ազգային ժողովի նախագահ Ալեն Սիմոնյանը հավատացած է, որ Հայաստանի և Ադրբեջանի միջև խաղաղության հաստատման ճանապարհին Կիպրոսը կունենա իր ներդրումը:
«Արմենպրես»-ի հաղորդմամբ՝ Սիմոնյանը նման դիրքորոշում հայտնեց խորհրդարանում Կիպրոսի Ներկայացուցիչների պալատի նախագահ Անիտա Դիմիտրիուի հետ հանդիպումից հետո համատեղ ասուլիսում:
Հանդիպմանն Ալեն Սիմոնյանն Անիտա Դիմիտրիուին ներկայացրել է Հայաստանի և Ադրբեջանի միջև խաղաղության համաձայնագրի հետ կապված իրավիճակը:
«Եվ վստահ եմ, որ խաղաղության հաստատման ճանապարհին Կիպրոսը իր ներդրումը կունենա, ինչպես անցյալում է ունեցել, ինչպես մշտապես աջակցել է այդ խնդրին»,-ասաց Սիմոնյանը:
Նա վստահեցրեց, որ Հայաստանը նույնպես մշտապես աջակցել և աջակցելու է Կիպրոսին՝ Կիպրոսի խնդրի հարցում: Այդ հարցով կողմերը ևս քննարկում են ունեցել:
Հայաստանի ԱԺ նախագահը Կիպրոսի իր գործընկերոջը ներկայացրել է նաև Բաքվում ապօրինաբար պահվող հայ գերիների, անհետ կորած համարվողների խնդիրը:
«Երկու կողմից կա լիակատար ընկալում, մեր շահերի լիակատար համընկնում, որի համար ևս մեկ անգամ շնորհակալ եմ իմ հարգելի գործընկերոջը»,–ընդգծեց ԱԺ նախագահը:
Կիպրոսի Ներկայացուցիչների պալատի նախագահ Անիտա Դիմիտրիուի գլխավորած պատվիրակությունը Հայաստանում է ԱԺ նախագահ Ալեն Սիմոնյանի հրավերով:
Բաժանորդագրվեք մեր ալիքին Telegram-ում