Երևանի քաղաքապետը չի բացառում առանց կատալիզատոր մեքենաների արգելքը

Երևանի քաղաքապետարանը օդի աղտոտվածության նվազեցման նպատակով քննարկվում են մի շարք սահմանափակումներ, այդ թվում՝ առանց կատալիզատոր ավտոմեքենաների շահագործման արգելքը։ «Արմենպրես»-ի հաղորդմամբ՝ լրագրողների հետ ճեպազրույցում այս մասին ասաց Երևանի քաղաքապետ Տիգրան Ավինյանը՝ անդրադառնալով մայրաքաղաքում օդի աղտոտվածության խնդիրներին և քաղաքապետարանի ծրագրերին։

«Օդի աղտոտվածության խնդիրը տասնամյակների խնդիր է։ Մենք սկսել ենք դրա շուրջ խոսել, քանի որ ունենք համապատասխան սարքավորումներ, որոնք ձմեռային ամիսներին ցույց են տալիս նորմայից էական շեղումներ։ Բայց սա միայն Երևանի խնդիրը չէ, ամբողջ Արարատյան տարածաշրջանում այդ ամիսներին նման պատկեր է արձանագրվում», – նշեց Ավինյանը։

Ավինյանի խոսքով՝ քաղաքապետարանը արդեն ունի օդի աղտոտվածության մեղմմանն ուղղված քառամյա ծրագիր, որի հիմնական գործիքը մշտադալար ծառերի տնկումն է, սակայն նաև նախատեսվում են այլ միջոցառումներ։

«Ծրագրում ներառված են միջոցառումներ, որոնք վերաբերում են առանց կատալիզատորների ավտոմեքենաների շահագործմանը, ինչպես նաև՝ աղտոտող գործարանների վրա վերահսկողության խստացմանը», – նշեց նա։

Անդրադառնալով այն հարցին, թե արդյոք ապագայում հնարավոր է կատալիզատոր չունեցող ավտոմեքենաների արգելք, Ավինյանը պատասխանեց,

«Գիտեք, ես կարծում եմ՝ ինչ-որ փուլում սա նաև բխելու է Հայաստանի Հանրապետության պարտավորություններից, քանի որ մենք ևս անդամ ենք տարբեր միջազգային կանաչ նախաձեռնությունների։ Իրականում, մտածելով մեր առողջության մասին՝ մենք այդ սահմանափակումները մտցնելու ենք»։