1 րոպեի ընթերցում
Հայաստանի Հանրապետությունում Ֆրանսիայի Հանրապետության դեսպանության մշակույթի և համագործակցության հարցերով բաժինը Գավառի պետական համալսարանին նվիրել է ֆրանսերեն գրքեր:
Ինչպես «Արմենպրես»-ին տեղեկացրին Գավառի պետական համալսարանի տեղեկատվության և հասարակայնության հետ կապերի բաժնից, գրքերը փոխանցել է ՀՀ-ում Ֆրանսիայի դեսպանության մշակույթի և համագործակցության հարցերով բաժնի կրթական համագործակցության պատասխանատու Դոմինիկ Վեսը։
Այնուհետ Դոմինիկ Վեսը և Գավառի պետական համալսարանի ռեկտոր Ռուզաննա Հակոբյանը քննարկել են համագործակցության հնարավոր ուղղությունները:
Գրքերի հավաքածուն կազմվել է Ֆրանսիայում գործող "Defis Humanitaires" մարդասիրական կազմակերպության նախագահ Ալեն Բուանեի նախաձեռնությամբ՝ ֆրանսիացի գրող Սիլվեն Տեսոնի հովանավորությամբ: Ծրագրին իրենց աջակցությունն են ցուցաբերել նաև Ֆրանսիայի Ազգային հրատարակչական միության նախագահ Վենսան Մոնտանը, «Ռենո» հրատարակչությունը և Օվերն-Ռոն-Ալպեր տարածաշրջանային իշխանությունները:
Նվիրատվության մեջ ներառված են ժամանակակից ֆրանսիական գրականության նմուշներ, որոնք կօգտագործվեն համալսարանի ֆրանսերենի դասընթացներում, ինչպես նաև կառաջարկվեն ֆրանսերենին տիրապետող ընթերցողներին:
