3 րոպեի ընթերցում
Ռուսաստանի Դաշնության արտաքին գործերի նախարար Սերգեյ Լավրովը ուղերձ է հղել Հայաստանի Հանրապետության և Ռուսաստանի Դաշնության միջև դիվանագիտական հարաբերությունների հաստատման 33-ամյակի կապակցությամբ՝ ընդգծելով, որ Երևանին և Մոսկվային հաջողվում է պահպանել քաղաքական երկխոսության բարձր մակարդակ։
«Արմենպրես»-ի հաղորդմամբ՝ այս մասին հայտնում է ՏԱՍՍ-ը՝ մեջբերելով ՌԴ ԱԳ նախարարի շնորհավորական ուղերձն՝ ուղղված Հայաստանի Հանրապետության արտաքին գործերի նախարար Արարատ Միրզոյանին։
«Չնայած ռուս-հայկական դաշինքը դրսից խարխլելու փորձերին՝ մեզ հաջողվել է պահպանել քաղաքական երկխոսության և արտաքին քաղաքականության համակարգման բարձր մակարդակ, ինչպես նաև երկկողմ ու ընդհանուր ինտեգրացիոն տարածքի ձևաչափով մեծացնել առևտրատնտեսական համագործակցությունը»,- ընդգծել է նախարար Լավրովը։
Վերջինս նաև հավելել է, որ Ռուսաստանի Դաշնությունը պատրաստ է շարունակել համատեղ աշխատանքը՝ նպատակ ունենալով հետագայում խորացնել և բարելավել գործընկերության արդյունավետությունն՝ ի շահ երկու երկրների քաղաքացիների և Հարավային Կովկասում խաղաղության և անվտանգության ամրապնդման։
«Ընդունեք իմ անկեղծ շնորհավորանքները Ռուսաստանի Դաշնության և Հայաստանի Հանրապետության միջև դիվանագիտական հարաբերությունների հաստատման 33-րդ տարեդարձի կապակցությամբ»,-իր ուղերձում նշել է ՌԴ ԱԳՆ ղեկավարը։
Սերգեյ Լավրովի բնորոշմամբ՝ երկկողմ դիվանագիտական հարաբերությունների հաստատման իրադարձությունը նշանավորել է Մոսկվայի և Երևանի միջև երկկողմ հարաբերությունների ժամանակակից փուլի սկիզբը:
«Հիմնվելով հոգևոր և բարոյական արժեքների ընդհանրության, միջոլորտային և հումանիտար շփումների ավանդական հզորության վրա՝ Ռուսաստանը և Հայաստանը մշակել են ամուր իրավական դաշտ, կառուցել բազմակողմ, հավասար, փոխշահավետ հարաբերություններ»,-շեշտել է Լավրովը:
ՌԴ ԱԳ նախարարն իր հայ գործընկերոջը՝ Արարատ Միրզոյանին և ՀՀ ԱԳՆ բոլոր աշխատակիցներին մաղթել է առողջություն, բարեկեցություն և հաջողություններ մասնագիտական գործունեության մեջ, իսկ եղբայրական հայ ժողովրդին՝ բարօրություն։
