4 րոպեի ընթերցում
ԱՆՈՆՍ
07 մարտ, 2025
Պետական կառույցներ
Ժամը 11:00-ին «Արմենպրես» լրատվական գործակալության մամուլի սրահում (Աբովյան 9) տեղի կունենա Էմանուել (Մանվել) Մարգարյանի հեղինակած ««Արարատ-73»-ը «Հայաստանի ֆիզկուլտուրնիկ» թերթի տարեգրության մեջ» գրքի շնորհանդեսը։ Միջոցառմանը ներկա կլինեն «Արարատ-73»-ի լեգենդար ֆուտբոլիստներ՝ Էդուարդ Մարգարովը, Սերգեյ Բոնդարենկոն, Նորայր Մեսրոպյանը և Սերգեյ Պողոսյանը։
ԲՈՒՀ-եր, կրթական հաստատություններ
Ժամը 19:00-ին Հայաստանում ֆրանսիական համալսարանում (Դավիթ Անհաղթի 10) Կանանց իրավունքների պաշտպանության միջազգային օրվա կապակցությամբ ՀՖՀՀ-ն արդեն 4-րդ անգամ կազմակերպում է պանելային քննարկում՝ հաջողությունների հասած կին շրջանավարտների հետ։ «Մտքի կանայք, գործի կանայք» քննարկման 4-րդ թողարկումը կրում է «Կանայք և առաջնորդությունը. նորարարություն հանուն ապագայի» խորագիրը: Բանախոսներ՝ 2006թ.-ի մարքեթինգի բակալավրի և 2008թ.-ի միջազգային գործարարության մագիստրատուրայի շրջանավարտ, 2009 թվականից առ այսօր՝ ձեռներեց, միջազգային էքսպերտ բիզնեսի ու մարքեթինգի ոլորտում դոկտոր Լիլիթ Ճուղուրյան, իրավունքի մագիստրատուրայի 2012թ.-ի շրջանավարտ, 2020 թվականից Safe YOU հավելվածի և Impact Innovations Institute-ի գործառնական հարցերով տնօրեն Լիլիթ Շախուլյան, մարքեթինգի ֆակուլտետի 2018թ. շրջանավարտ, DeFi նախագծերի ղեկավար Fastex-ում Դիանա Պարտիզպանյան։ Մոդերատոր՝ ՀՖՀՀ ռեկտոր, դոկտոր Սալվա Նակուզի։ Միջոցառմանը հրավիրված են մի շարք բարձրաստիճան հյուրեր, դեսպաններ, ՀԿ-ների ներկայացուցիչներ և ուսանողներ։ +374 98061798:
Մամուլի ակումբներ
Ժամը 12:00-ին Մեդիա կենտրոնում տեղի կունենա քննարկում՝ «Դատավորների նկատմամբ կարգապահական վարույթ. Էթիկայի և կարգապահական հարցերի հանձնաժողովի դերը՝ դատաիրավական բարեփոխումներում» թեմայով։ Բանախոսներ՝ ՀՀ արդարադատության նախարարության «Օրենսդրության զարգացման կենտրոն» հիմնադրամի տնօրեն Դավիթ Ղարիբյան, Իրավունքի զարգացման և պաշտպանության հիմնադրամի տնօրեն Գենյա Պետրոսյան, Թրանսփարենսի Ինթերնեշնլ հակակոռուպցիոն կենտրոնի իրավաբան Միհրան Բուլղադարյան:
Ժամը 13:00-ին Sputnik Արմենիա մուլտիմեդիոն մամուլի կենտրոնում կկայանա ՀՀ ԱԺ նախկին փոխնախագահ, «Հանրապետական» կուսակցության ներկայացուցիչ Էդուարդ Շարմազանովի ասուլիսը՝ «Աշխարհը և մենք. ի՞նչ մարտահրավերներ են կանգնած Հայաստանի առջև» թեմայով։ Աշխարհի «շախմատի մեծ խաղատախտակի» վրա սկսվել է խաղաքարերի ակտիվ փոխանակումը։ Քաղաքական «կոմբինացիաները» դառնում են էլ ավելի բարդ: Ի՞նչ պետք է անի Հայաստանը, որպեսզի արդյունքում միջազգային ասպարեզում չհայտնվի քաղաքական ցուգցվանգում։
Մշակույթ
Ժամը 14:00-ին Հայաստանի ազգային գրադարանի թամանյանական մեծ դահլիճում /Տերյան 72/ տեղի կունենա տոնական համերգ՝ նվիրված Կանանց միջազգային օրվան։ Ելույթ կունենան «Մաեստրո» մշակութային կազմակերպության «Բյուր Աստղ» նախագծի շնորհալի երաժիշտ կատարողները։ Կներկայացվեն նաև նրանց ձեռքի աշխատանքները։