5 րոպեի ընթերցում
ԱՆՈՆՍ
26 փետրվար, 2025
Պետական կառույցներ
Ժամը 15:30-ին Հայաստանի պատմության թանգարանում տեղի կունենա Զորավար Անդրանիկ Օզանյանի ծննդյան 160-ամյակին նվիրված միջոցառում, որի շրջանակներում ոլորտի ներկայացուցիչները հանդես կգան բանախոսություններով՝ ներկայացնելով նրա կյանքն ու գործունեությունը, մարտական ուղին և այլ հետաքրքիր դրվագներ Զորավարի կյանքից: Բանախոսներ՝ ՀՊԹ նոր և նորագույն պատմության բաժնի վարիչ Սեդա Գալստյան և ԵՊՀ Հայոց պատմության ամբիոնի վարիչ, պ.գ.դ. պրոֆեսոր Էդիկ Մինասյան։ Միջոցառման շրջանակում կամփոփվի նաև «Սուրբ անունդ պիտի հիշվի դարեդար» խորագիրը կրող ժամանակավոր ցուցադրությունը և տեղի կունենա 360° առցանց ցուցադրության շնորհանդեսը։ Ցուցադրության շրջանակներում շուրջ 5 ամիս թանգարանում ցուցադրվում էին Զորավարի մարտական թուրը, մազափունջը, ընտանեկան լուսանկարներ և փաստաթղթեր, անձնական իրեր ու այլ արժեքավոր նմուշներ։
Կուսակցություններ, ՀԿ-ներ, միջազգային կազմ-ներ
Ժամը 13:00-ից «Հոլիդեյ Ինն» հյուրանոցում (Ամիրյան 2, Հանրապետության հրապարակի հարևանությամբ) կկայանա «Արժանապատիվ մայրություն. ո՛չ մանկաբարձական բռնությանը» ծրագրի փակման միջոցառումը։ Ծրագիրն իրականացվել է Եվրասիա համագործակցություն հիմնադրամի կողմից Շվեդիայի կառավարության աջակցությամբ իրականացվող ծրագրի շրջանակում։ Միջոցառման ընթացքում կանցկացվի «Արժանապատիվ մայրություն» լրագրողական և ստեղծագործական նյութերի մրցանակաբաշխությունը: Միջոցառման ժամանակ կներկայացվի նաեւ «Մանկաբարձական բռնության դրսևորումները Հայաստանում» որակական հետազոտությունը, որն իրականացվել է հայաստանյան երեք խոշոր քաղաքում։ Միջոցառմանը հրավիրված են միջազգային և հայաստանյան պետական կառույցների ղեկավարներ ու ներկայացուցիչներ։ Ներկա կլինի նաև Հայաստանում Շվեդիայի Թագավորության փոխդեսպան Կլաս Վալդենստրյոմը:
Ժամը 14:00-ին «Էլիթ պլազա» բիզնես կենտրոնի «Մանթաշով» սրահում /Մովսես Խորենացի 15, մուտքը՝ Խորենացի փողոցից/ կկայանա ՀՅԴ 35-րդ ընդհանուր ժողովի պաշտոնական բացումը։ Լրատվական միջոցների ներկայացուցիչները հրավիրվում են լուսաբանելու միջոցառումը, ինչից հետո հատուկ առանձնացված հատվածում հնարավորություն կլինի հարցազրույցներ վարելու Հ Յ Դաշնակցության աշխարհասփյուռ կառույցի ներկայացուցիչների հետ։
Ժամը 18:30-ին «Հոլիդեյ Ինն Երևան» հյուրանոցի «Տուշպա» սրահում (Ամիրյան 2) տեղի կունենա «Sweden Alumni Talk։ Կրթության և համագործակցության հնարավորությունները Շվեդիայում» թեմայով միջոցառումը։ Նախաձեռնության նպատակն է Շվեդիայի շրջանավարտների միջոցով ներկայիս ուսանողներին և երիտասարդ մասնագետներին ներկայացնել Շվեդիայում կրթության և համագործակցության հնարավորությունները։ Բացման խոսք՝ ՀՀ-ում Շվեդիայի դեսպան Պատրիկ Սվենսոն, Հայաստանում Շվեդիայի շրջանավարտների ցանցի խորհրդի նախագահ Արման Գասպարյան: Միջոցառումը կազմակերպվում է Հայաստանում Շվեդիայի շրջանավարտների ցանցի կողմից՝ Շվեդիայի դեսպանության հետ համագործակցությամբ։
Մշակույթ
Ժամը 14:00-ին ՀԳՄ կլոր սրահում տեղի կունենա արձակագիր, թարգմանչուհի Գոհար Ռշտունու «Նոթեր Կոստան Զարյանի մասին» (երկլեզու) գրքի շնորհանդեսը՝ նվիրված Կոստան Զարյանի ծննդյան 140-ամյակին:
Ժամը 18:00-ին AHA collective-ի ցուցասրահում (Մոսկովյան 31, 2-րդ մուտք, 2-րդ հարկ) AHA collective-ը հրավիրում է լրագրողներին ներկա գտնվելու Սենտ Էտիենի 13-րդ միջազգային դիզայն բիենալեի մամուլի ասուլիսին, ուր Հայաստանը պատվո հյուրն է։ Ցուցադրության համադրողներ՝ Նայիրի Խաչատուրեանը (AHA collective) և Ժան Ֆրանսուա Դինքջեանն ու Էլուա Շաֆայը (Normal Studio) կներկայացնեն մայիսին մեկնարկող բիենալեի հարուստ ծրագիրն ու Հայաստանի՝ «Ծալք ու ծավալ. ստեղծագործել Հայաստանում» խորագիրը կրող ցուցադրության հայեցակարգը։