3 րոպեի ընթերցում
ԱՄՆ նախագահ Դոնալդ Թրամփը երկար և արդյունավետ հեռախոսազրույց է ունեցել Ռուսաստանի նախագահ Վլադիմիր Պուտինի հետ։ «Արմենպրես»-ի հաղորդմամբ՝ նա այդ մասին հայտնել է սոցցանցի Truth Social հարթակում։
«Մենք քննարկել ենք Ուկրաինային, Մերձավոր Արևելքին, էներգետիկային, արհեստական բանականությանը, դոլարի հզորությանն առնչվող հարցեր և մի շարք այլ թեմաներ: Մենք անդրադարձանք մեր ժողովուրդների մեծ պատմությանը և այն փաստին, որ միասին այդքան հաջող կռվեցինք Երկրորդ համաշխարհային պատերազմում՝ հիշելով, որ Ռուսաստանը տասնյակ միլիոնավոր մարդկանց կորցրեց, և մենք նույնպես կորցրեցինք շատ մարդկանց: Մենք խոսեցինք մեր ազգերի ուժեղ կողմերի և այն մեծ օգուտի մասին, որ մի օր կունենանք` միասին աշխատելով»,- գրել է Թրամփը։
Նա հավելել է, որ ՌԴ նախագահն ու ինքը ցանկություն են հայտնել դադարեցնել միլիոնավոր կյանքեր խլող ռուս-ուկրաինական պատերազմը:
«Նախագահ Պուտինն անգամ օգտագործեց իմ քարոզարշավի շատ ուժեղ կարգախոսը՝ «Ողջախոհություն»: Մենք երկուսս էլ շատ ամուր հավատում ենք դրան: Պայմանավորվեցինք աշխատել միասին, շատ սերտորեն, ներառյալ միմյանց այցելելը: Նաև պայմանավորվել ենք, որ մեր համապատասխան թիմերը անհապաղ սկսեն բանակցություններ, և մենք կսկսենք զանգահարել Ուկրաինայի նախագահ Զելենսկիին, որպեսզի տեղեկացնենք նրան զրույցի մասին, մի բան, որը ես կանեմ անհապաղ»,- հայտնել է ԱՄՆ նախագահը։
Նա խնդրել է պետքարտուղար Մարկո Ռուբիոյին, ԿՀՎ-ի տնօրեն Ջոն Ռաթքլիֆին, Ազգային անվտանգության հարցերով խորհրդական Մայքլ Վալցին և դեսպան, հատուկ բանագնաց Սթիվ Վիտկոֆին ղեկավարել բանակցությունները, որոնք, իր խորին համոզմամբ, հաջողությամբ կպսակվեն:
«Միլիոնավոր մարդիկ են զոհվել պատերազմում, որը չէր լինի, եթե ես լինեի նախագահ, բայց դա տեղի ունեցավ, ուստի այն պետք է ավարտվի: Այլևս կյանքեր չպետք է կորցնել: Ես ուզում եմ շնորհակալություն հայտնել նախագահ Պուտինին այս կոչի հետ կապված իր ժամանակի և ջանքերի համար, ինչպես նաև երեկ Մարկ Ֆոգելին՝ հրաշալի մարդուն ազատ արձակելու համար, ում ես անձամբ ողջունեցի երեկ երեկոյան Սպիտակ տանը: Հավատում եմ, որ այս ջանքերը կհանգեցնեն հաջող ավարտի»,- եզրափակել է իր գրառումը Թրամփը: