1 րոպեի ընթերցում
ԱՄՆ նորընտիր նախագահ Դոնալդ Թրամփը գոհունակությամբ է ընդունել ՀԱՄԱՍ-ի կողմից պատանդների ազատ արձակման լուրը:
«Պատանդները սկսում են դուրս գալ այսօր. երեք հրաշալի երիտասարդ կանայք կլինեն առաջինը»,- «Արմենպրես»-ի հաղորդմամբ՝ նշել է Դոնալդ Թրամփը Truth Social հարթակում:
Ավելի վաղ Իսրայելի վարչապետի գրասենյակը, ստանալով ՀԱՄԱՍ-ից ազատ արձակվող պատանդների ցուցակը, հայտարարել էր, որ Գազայի հատվածում հրադադարը ուժի մեջ կմտնի տեղական ժամանակով հունվարի 19-ի ժամը 11:15-ին:
Գազայի հատվածում հակամարտող կողմերը՝ Իսրայելը և ՀԱՄԱՍ շարժումը, Կատարի, Եգիպտոսի և ԱՄՆ-ի միջնորդությամբ համաձայնության են եկել հունվարի 19-ից 42 օրով զինադադարի շուրջ և հայտարարել ռազմական գործողությունները վերջնականապես դադարեցնելու ցանկության մասին։