3 րոպեի ընթերցում
ԱՆՈՆՍ
09 դեկտեմբեր, 2024
ՀՀ ԱԺ
Ժամը 13:00-ին ԱԺ նիստերի դահլիճին կից սրահում տեղի
կունենա ԱԺ պետական-իրավական հարցերի մշտական հանձնաժողովի նախագահ, ԵԽԽՎ իրավական հարցերի և մարդու իրավունքների հանձնաժողովի անդամ Վլադիմիր Վարդանյանի ճեպազրույցը խորհրդարանում հավատարմագրված լրատվամիջոցների համար։
Պետական կառույցներ
Ժամը 10:00-ին ՀՀ գիտությունների ազգային ակադեմիայի նախագահության նիստերի դահլիճում (Մարշալ Բաղրամյան 24, 2-րդ հարկ) տեղի կունենա «Շիրվանի, Գարդմանի և Նախիջևանի հայությունը. տեղաբնիկությունից մինչև փախստականություն» գիտաժողովը։
Գիտաժողովի նպատակն է քննարկել Շիրվանի, Գարդմանի և Նախիջևանի հայության խնդիրները՝ վեր հանելով պատմական արդարության վերականգնման, բռնագաղթած հայերի իրավունքների պաշտպանության և այլ հարցեր։ Գիտաժողովի հիմնական թեմաներն են՝ փախստականների իրավունքների պաշտպանություն, բռնագաղթեր և իրավական հիմնախնդիրներ, էթնոժողովրդագրական փոփոխությունների և տարածաշրջանի սոցիալ-տնտեսական իրավիճակի վերլուծություն։
Գիտաժողովը կազմակերպում են «Գեղարդ» գիտավերլուծական հիմնադրամը և «Գարդման, Շիրվան, Նախիջևան» համահայկական միությունը։
Կուսակցություններ, ՀԿ-ներ, միջազգային կազմ-ներ
Ժամը 14:30-ին (միջոցառման սկիզբը` 15:00), «Արաբկիր» բժշկական համալիրում տեղի կունենա միջոցառում։ «Արաբկիր» բժշկական համալիր-երեխաների եւ դեռահասների առողջության ինստիտուտը Առողջապահության համաշխարհային կազմակերպությունից ստացել է «Համագործակցող կենտրոն» (Collaborating centre) կարգավիճակ:
Մամուլի ակումբներ
ժամը 11։00-ին Մեդիա կենտրոնում տեղի կունենա քննարկում՝ «Դատապարտյալների պայմանական վաղաժամկետ ազատման պարադոքսը․ պայքար բարեփոխումների և դիմադրության միջև» թեմայով։
Բանախոսներ՝
Զարուհի Մեջլումյան, փաստաբան
Նինա Կարապետյանց, «Հելսինկյան ասոցիացիա» ՀԿ ղեկավար
Արծվի Բախչինյան, հայագետ, գրող, բանասիրական գիտությունների թեկնածու
Քննարկմանը մասնակցելու հրավեր է ուղարկվել նաև Գլխավոր դատախազություն, Արդարադատության նախարարություն, Քրեակատարողական ծառայություն։
Քննարկման ընթացքում անդրադարձ կկատարվի դատապարտյալների պայմանական վաղաժամկետ ազատման հետ կապված իրավական և գործնական մարտահրավերներին։ Քաղաքացիական հասարակության ներկայացուցիչները պնդում են, որ թեև պետությունը պաշտոնապես որդեգրել է պատժողականից վերականգնողական արդարադատությանն անցնելու քաղաքականություն, դատաիրավական համակարգը գործնականում դիմադրում է այս փոփոխությանը, ինչը հանգեցնում է իրավական փակուղու: Արդարադատության նախարարությունը մշակել է դատապարտյալների պայմանական վաղաժամկետ ազատման համակարգի վերանայման հայեցակարգ։ Այնուամենայնիվ, փորձագետները զգուշացնում են, որ այս հայեցակարգի ներկայիս տեսքով ընդունումը կարող է հանգեցնել մարդու իրավունքների համակարգային ոտնահարման հատկապես ցմահ ազատազրկվածների պարագայում։