Սիրիական զորքերը Հալեպում և Իդլիբում հետ են մղում զինյալների հարձակումները

ԵՐԵՎԱՆ, 29 ՆՈՅԵՄԲԵՐԻ, ԱՐՄԵՆՊՐԵՍ: Սիրիական բանակի ստորաբաժանումները հակահարձակում են սկսել «Ջաբհաթ ան Նուսրա» ծայրահեղական խմբավորման զինյալների դիրքերի ուղղությամբ, որոնք ավելի քան 20 բնակավայր են գրավել Հալեպ քաղաքից դեպի հյուսիս և արևմուտք։ Հակահարձակում է սկսվել նաև Իդլիբում։ «Արմենպրես»-ի փոխանցմամբ՝ այդ մասին հայտնում է Al Mayadeen-ը։

Ըստ լրատվամիջոցի տեղեկատվության՝ կառավարական ուժերն  իրականացված գործողության ընթացքում ազատագրել են Էլ Բակում քաղաքը։ Ավելի վաղ Հալեպ են տեղափոխվել օգնական ուժեր Սիրիայի այլ շրջաններից։ Փակվել է երթևեկությունը Դամասկոսն ու Հալեպը կապող M-5 միջազգային մայրուղով՝ զինված հարձակումների սպառնալիքի պատճառով։

«Ջաբհաթ ան Նուսրա»-ի և նրա դաշնակից արմատական ​​խմբավորումների զինյալները նոյեմբերի 27-ի դավադիր հարձակման ընթացքում վտանգավոր հեռավորությանբ մոտեցել են Հալեպին և գրավել մի քանի նպաստավոր դիրքեր քաղաքից 7-10 կմ հեռավորության վրա։

Հալեպի մերձակայքում ռազմաճակատի մի քանի հատվածներում կառավարական ուժերին հաջողվել է զսպել հակառակորդի առաջխաղացումը, նա կորուստներ է կրել, ոչնչացվել է մի քանի հարյուր զինյալ: 

Al Mayadeen-ը նաև հաղորդում է, որ սիրիական բանակը հետ է մղում զինյալների հարձակումն Իդլիբում։ Ըստ հրապարակման՝ բանակը կանգնեցրել է «Ջաբհաթ ան Նուսրա»-ի և նրա դաշնակիցների առաջխաղացումը Իդլիբի հարավ-արևելյան ճակատում և հակահարձակում է սկսել՝ փորձելով հետ գրավել զինյալների գրաված դիրքերը։