ՆԳ նախարարությունը միանում է ընդդեմ գենդերային բռնության քարոզարշավին

ԵՐԵՎԱՆ, 25 ՆՈՅԵՄԲԵՐԻ, ԱՐՄԵՆՊՐԵՍ: Կանանց նկատմամբ բռնության վերացման միջազգային օրվա շրջանակում նոյեմբերի 25-ին Հայաստանում մեկնարկել է «Ընդդեմ գենդերային բռնության ակտիվության 16-օրյակ» թեմայով քարոզարշավը, որի նպատակն է գենդերային բռնության ու տեսակների մասին իրազեկել բնակչությանը, խթանել հասարակության շահերի պաշտպանությանն ու բռնության կանխարգելմանն ուղված միջոցառումների իրականացմանը, ԶԼՄ-ներում խնդրի լուսաբանման տարածվածությանը, ամրապնդել կանանց իրավունքների և առողջապահության հարցերով զբաղվող կազմակերպությունների փոխլրացնող համագործակցությունը:

Ինչպես «Արմենպրես»-ին տեղեկացրին ՀՀ ներքին գործերի նախարարությունից, գերատեսչությունը նույնպես միացել է քարոզարշավին՝ նպատակ ունենալով խթանել կանանց իրավունքների պաշտպանությանն ու կանխարգելել բռնության ցանկացած դրսևորում։ 

Ըստ աղբյուրի՝ ընտանեկան բռնության կանխարգելման միջոցառումների շրջանակում ՆԳ նախարարությունը կարևորում է ոստիկանության, քաղաքացիական հասարակության և ոլորտային մասնագետների համագործակցված աշխատանքը, ինչը թույլ կտա բարձրացնել հանրային իրազեկվածությունը և արձանագրել վարքագծային փոփոխություններ։

Նշվում է, որ քարոզարշավի ընթացքում ՆԳ նախարարությունը նախատեսում է մի շարք միջոցառումներ։