7 րոպեի ընթերցում
ԱՆՈՆՍ, 19 նոյեմբեր, 2024
ՀՀ ԱԺ
Ժամը 11:00-ին ՀՀ ԱԺ նիստերի դահլիճում Տնտեսական հարցերի մշտական հանձնաժողովի որոշմամբ կանցկացվեն խորհրդարանական լսումներ: Կքննարկվի «Հայաստանի Հանրապետության հարկային օրենսգրքում լրացումներ եւ փոփոխություններ կատարելու մասին» եւ ««Հայաստանի Հանրապետության հարկային օրենսգրքում փոփոխություններ կատարելու մասին» 2024 թվականի հունիսի 12-ի ՀՕ-285-Ն օրենքում լրացումներ կատարելու մասին» օրենքների նախագծերի փաթեթը: Խոսքը վերաբերում է մասնագիտական ծառայությունների ոլորտը շրջանառության հարկի ռեժիմից ընդհանուր հարկման համակարգ տեղափոխելու նախաձեռնությանը:
Ժամը 11:00-ին Ազգային ժողովի 334 սրահում Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախաձեռնությամբ տեղի կունենա աշխատանքային քննարկում՝ «Գիտության և տեխնոլոգիայի դերը Հայաստանի անվտանգության ամրապնդման և տնտեսության զարգացման գործում» թեմայով։ ՀՀ ԱԺ, Գիտուժ:
Պետական կառույցներ
Ժամը 10:00-ին գումարվելու է Երևան քաղաքի ավագանու 3-րդ նստաշրջանի 3-րդ նիստը:
Ժամը 09:30-ից «Դաբլթրի բայ Հիլթն» հյուրանոցի «Փարիզ» սրահում (Գրիգոր Լուսավորիչ 4/2) տեղի կունենա Կառավարություն-Տարածքային կառավարման մարմիններ-Քաղաքացիական հասարակություն ձևաչափով ֆորում՝ «Լեռնային Ղարաբաղից բռնի տեղահանվածների իրավունքներն ու սոցիալական ներառումը» թեմայով: Միջոցառմանը կբանախոսեն ՀՀ ՆԳՆ Միգրացիայի և քաղաքացիության ծառայության, ՀՀ ՏԿԵ նախարարության, ՀՀ ԱՍՀ նախարարության պաշտոնյաներ և թեմայի առնչությամբ գործունեություն ծավալած փորձագետներ: Մասնակիցների և քննարկումներ իրականացնողների ցանկում են նաև միջազգային կառույցների, դեսպանատների, բարձրագույն կրթական հաստատությունների ներկայացուցիչներ, ինչպես նաև ոլորտում շահագրգիռ հասարակական կազմակերպություններ: Ֆորումի ընթացքում հավաքագրված տեղեկության հիման վրա ծրագրային փորձագետների օժանդակությամբ կպատրաստվի համապատասխան առաջարկություններով ու դիտարկումներով փաստաթուղթ, որը հետագայում կքննարկվի ու կջատագովվի ոլորտային պատասխանատուների հետ: «Սոցիալական Արդարություն» ՀԿ, հեռ. 37491 05 13 14:
Ժամը 11:00-ին ՀՀ գիտությունների ազգային ակադեմիայում (Բաղրամյան 24, 2-րդ հարկ) տեղի կունենա «Հայոց լեզու. նրա զարգացման հիմնական միտումներն ու դրանց արտացոլումն ուսումնական գործընթացում» գիտագործնական համաժողովը։ Համաժողովի ընթացքում առաջատար մասնագետներ ՀՀ գիտական և կրթական կառույցներից կներկայացնեն գիտական և հանրամատչելի զեկուցումներ հայոց լեզվի ուսուցիչների համար, կքննարկվեն լեզվամտածողության, հնչյունաբանության, բառագիտության, ձևաբանության, շարահյուսության հարցեր։ Համաժողովը կազմակերպում են ՀՀ ԳԱԱ-ն, ՀՀ ԳԱԱ Հրաչյա Աճառյանի անվան լեզվի ինստիտուտը և ՀՀ ԳԱԱ գիտակրթական միջազգային կենտրոնը՝ ՀՀ ԿԳՄՍ նախարարության աջակցությամբ։ ՀՀ ԳԱԱ
Ժամը 14:00-ին «Արմենպրես» լրատվական գործակալության մամուլի սրահում (Սարյան 22) տեղի կունենա ՀՀ ԲՏԱ նախարարի տեղակալ Ռուբեն Սիմոնյանի, Հայտերի գնահատման հանձնաժողովի անդամ և FAST հիմնադրամի գործադիր տնօրեն Սյուզաննա Շամախյանի, Cifora ընկերության համահիմնադիր և գործադիր տնօրեն, ծրագրի շահառու Հրանտ Մանասյանի ասուլիսը: Թեմա. տեխնոլոգիական ոլորտի շուրջ 300 աշխատակիցներ կվերապատրաստվեն. տրվել է «Կարողությունների զարգացում» բաղադրիչի մեկնարկը։
Մշակույթ
Ժամը 14:00-ին Ազգային գրադարանի թամանյանական մեծ ցուցասրահում կկայանա Ազգային գրադարանի և Արվեստի ռուսաստանյան պետական գրադարանի համատեղ ցուցադրությունը՝ նվիրված բալետի ստեղծման պատմությանը։ Գրքային և նոտային հրատարակություններով, թատերական ազդագրերով և լուսանկարներով ներկայացված են Արամ Խաչատրյանի, Էդգար Հովհաննիսյանի, Գրիգոր Եղիազարյանի, Գրիգոր Հախինյանի և այլ կոմպոզիտորների ստեղծագործությունները։ «Ռուսական բալետի առաջին անունները» պաստառաշարը ներկայացնում է 1890-ական թվականներից մինչև մեր օրերը Արվեստի ռուսաստանյան պետական գրադարանի հազվագյուտ թատերական լուսանկարների հավաքածուն։ Թամանյանական մեծ դահլիճում հայ բալետի պատմությանը և երևելի դեմքերին նվիրված դասախոսությամբ հանդես կգա ՀՀ վաստակավոր մանկավարժ, բալետի քննադատ Հասմիկ Մարկոսյանը։
Ժամը 19:00-ին «Հայ-Արտ» մշակութային կենտրոնում (Մաշտոցի 7 Ա) կբացվի «Հակոբ Կոջոյան» կրթահամալիրի՝ Սերգեյ Փարաջանովի ծննդյան 100 ամյակին նվիրված 10-օրյա ցուցահանդես, որն ուղեկցվելու է դասընթացներով: Տաս օր շարունակ Փարաջանովին նվիրված ցուցադրությամբ, քննարկումներով, ելույթներով հանդես կգան «Հակոբ Կոջոյան» կրթահամալիրի ուսուցիչներն ու աշակերտները, տնօրենը, Երևանի թատրոնի և կինոյի պետական ինստիտուտի, Հայաստանի գեղարվեստի պետական ակադեմիայի, Հայկական պետական մանկավարժական համալսարանի ուսանողները: Միջոցառումը հրաշալի հնարավորություն է ծոնթանալու երիտասարդ սերնդի փարաջանովյան ընկալումներին: Միջոցառումների շարքը կբացվի «Սերունդների երկխոսություն. Փարաջանովը և ժամանակակիցները» ցուցահանդեսով։ Կողք կողքի կցուցադրվեն «Հակոբ Կոջոյան» կրթահամալիրի ուսուցիչների ու աշակերտների ստեղծագործությունները: Նոյեմբերի 29-ին միջոցառման փակում: «Հակոբ Կոջոյան» կրթահամալիր, հեռ. 091 806301:
Ժամը 19:00-ին Ռուսական արվեստի թանգարաում կկայանա թանգարանի 40-ամյակին նվիրված երեկո։ Երեկոն նաև հոբելյանական տարվա ամփոփումն է՝ նվիրված թանգարանի հիմնադիր՝ Սոցիալիստական աշխատանքի հերոս, ԽՍՀՄ պետական մրցանակի դափնեկիր, խորհրդային բժշկության առաջատար ներկայացուցիչ, պրոֆեսոր Արամ Հակոբի Աբրահամյանի ծննդյան 125-ամյակի և թանգարանի հիմնադրման 40-ամյակի: