2 րոպեի ընթերցում
ԵՐԵՎԱՆ, 13 ՆՈՅԵՄԲԵՐԻ, ԱՐՄԵՆՊՐԵՍ։ ԱՄՆ ընտրված նախագահ Դոնալդ Թրամփը հայտարարել է, որ պաշտպանության նախարարի պաշտոնում կնշանակի Փիթ Հեգսեթին, որը Fox News-ի հաղորդավար է և վետերան։ «Արմենպրես»-ի փոխանցմամբ՝ այս մասին հաղորդում է CNN-ը։
«Պատերազմ մարտիկների դեմ» վերնագրով իր գրքում Հեգսեթը գրել է, որ ծառայել է նախագահներ Ջորջ Բուշ Կրտսերի, Բարաք Օբամայի և Դոնալդ Թրամփի օրոք։ Բացի այդ, նրա ստորաբաժանումն աշխատել է նախագահ Ջո Բայդենի երդմնակալության ժամանակ։ Հեգսեթը հայտարարել է, որ 2021 թվականին Բայդենի երդմնակալության արարողության ժամանակ իրեն թույլ չեն տվել մասնակցել արարողությանը, իր խոսքով, կրոնական դաջվածքի պատճառով։
Նա բանակից հեռացել է 2021 թվականին։ Հեգսեթն ԱՄՆ բանակի ազգային գվարդիայի վետերան է, որը ծառայել է Աֆղանստանում, Իրաքում և Կուբայի Գուանտանամոյի ռազմաբազայում։ Իր հերթին Reuters-ը հաղորդում է, որ 44-ամյա վետերանը Թրամփի ամենաանակնկալ ընտրություններից մեկն էր, որի մասին նա հայտարարել է հունվարի 20-ին նախատեսված իր երդմնակալությունից առաջ։
Իր որոշման մասին հայտնելիս Թրամփը գովել է Հեգսեթին՝ նշելով, որ նա «կոշտ է, խելացի և «Ամերիկան առաջնահերթ է» գաղափարին հավատացող»։
Նոյեմբերի 5-ին կայացած նախագահական ընտրություններում Թրամփի հաղթանակից հետո հայտարարվել են մի քանի պաշտոններում հնարավոր նշանակումների մասին։