Միրզոյանը լավատեսություն է հայտնում մոտ ապագայում Հայաստան-Թուրքիա կարգավորման գործընթացում առաջընթացի վերաբերյալ
2 րոպեի ընթերցում
ԵՐԵՎԱՆ, 31 ՀՈԿՏԵՄԲԵՐԻ, ԱՐՄԵՆՊՐԵՍ։ Հայաստանի և Թուրքիայի միջև դինամիկ երկխոսություն է ընթանում։
«Արմենպրես»-ի հաղորդմամբ՝ Ազգային ժողովի մշտական հանձնաժողովների համատեղ նիստում «Հայաստանի Հանրապետության 2025 թվականի պետական բյուջեի մասին» ՀՀ օրենքի նախագծի քննարկման ժամանակ այս մասին ասաց Արտաքին գործերի նախարար Արարատ Միրզոյանը։
«Թուրքիայի հետ ունենք դինամիկ երկխոսություն, դրական երկխոսություն։ Հիշեցնեմ, որ երկու երկրների գերատեսչությունները աշխատանքներ էին տարել սահմանին գտնվող ենթակառուցվածքների վիճակը գնահատելու շուրջ։ Հիմա այդ աշխատանքները տարվում են և տարվելու են Կարս-Գյումրի երկաթուղու վիճակը գնահատման ուղղությամբ։ Մեր երկխոսությունն առաջին հերթին նրա մասին է, որ երկու երկրները պետք է հաստատեն դիվանագիտական հարաբերությունները, բացեն սահմանները, ունենան տրանսպորտային և այլ հաղորդակցություն և ընդհանրապես կարգավորեն իրենց հարաբերությունները»,- ասաց Միրզոյանը։
Նախարարը գաղտնիք չի համարում այն հանգամանքը, որ Թուրքիան Հայաստանի հետ հարաբերությունները որոշակիորեն կապում է Հայաստան-Ադրբեջան հարաբերությունների կարգավորման հետ։
«Մեր գնահատմամբ՝ սա այնքան էլ կառուցողական մոտեցում չի, և մենք մեր երկխոսությունը Թուրքիայի հետ ունենք առանց նախապայմանների, ունենք կոնկրետ պայմանավորվածություններ՝ սկզբում բացել սահմանը երրորդ երկրների քաղաքացիների և դիվանագիտական անձնագիր ունեցող անձանց համար։ Կան ավելի փոքրամասշտաբ համատեղ նախագծեր, օրինակ՝ Անիի մշակութային ժառանգության հետ կապված։
Ուզում եմ ասել, որ այստեղ էլ կա դինամիկ երկխոսություն։ Ուզում եմ կրկին լավատեսություն հայտնել այն մասին, որ մենք մոտ ապագայում կունենանք առաջընթաց»,-եզրափակեց Միրզոյանը։