6 րոպեի ընթերցում
ԱՆՈՆՍ
09 հոկտեմբեր, 2024
Պետական կառույցներ
Ժամը 10:00-ին Մատենադարանում հոկտեմբերի 9-12-ը տեղի կունենա «Հիշողության կերպարանքները» 13-րդ միջազգային ամենամյա գիտագործնական սեմինար։ Այն թվով 13-րդն է և անցկացվում է «Ձեռագիր և տպագիր ժառանգության պահպանման և վերականգնման նորագույն տեխնոլոգիաները» խորագրի ներքո։ Սեմինարին մասնակցում են շուրջ 15 երկրից ավելի քան 40 վերականգնողներ, հեղինակավոր գրադարանների, արխիվների և թանգարանների ղեկավարներ։ Բացմանը ողջույնի խոսքով հանդես կգան՝ ԿԳՄՍ նախարար Ժաննա Անդրեասյանը, Մատենադարանի տնօրեն Արա Խզմալյանը, ԵՄ դեսպան Վասիլիս Մարագոսը և «Արարատ Բանկ» ԲԲԸ խորհրդի նախագահ Գրիգոր Հովհաննիսյանը։ Սեմինարի շրջանակում հոկտեմբերի 11-ին ժամը՝ 18։00-ին Մատենադարանում կբացվի ձեռագրերի կենսաքիմիական հետազոտության լաբորատորիա։ Նույն օրը, ժամը 18։30-ին, տեղի կունենա «Մատենադարանի ճառագող առաքելությունը» նոր ցուցադրությունը, որին ներկայացվելու են տարբեր թանգարանների վերականգնված ցուցանմուշներ։
Ժամը 11:00-ին «Սինոփսիս Արմենիա» ընկերության շքասրահում /Արշակունյաց 41/ տեղի կունենա փոխըմբռնման հուշագրի ստորագրում՝ ՀՀ հանրակրթական և միջին մասնագիտական ուսումնական հաստատություններում STEP.ai գիտության և տեխնոլոգիայի կրթական ծրագրի ներդրման վերաբերյալ։ Հուշագիրը կստորագրեն ԿԳՄՍ նախարար Ժաննա Անդրեասյանը, Բարձր տեխնոլոգիական արդյունաբերության նախարար Մխիթար Հայրապետյանը, «Սինոփսիս Արմենիա» ՓԲԸ տնօրեն Հովիկ Մուսայելյանը, ՀԲԸՄ հայկական վիրտուալ համալսարանի հիմնադիր-նախագահ դոկտոր Երվանդ Զորյանը և ՏՀՏԳ միության գործադիր տնօրեն Էդուարդ Մուսայելյանը։ Միջոցառման ընթացքում նախատեսված են նաև STEP.ai արհեստական բանականություն ծրագրի առաջին դասընթացն ավարտած ավագ դպրոցների աշակերտների ավարտական նախագծերի ցուցադրություն և վկայականների հանձնման արարողություն։ ՀՀ ԿԳՄՍՆ
Ժամը 13:00-ին «Արմենպրես» լրատվական գործակալության մամուլի սրահում (Սարյան 22) տեղի կունենա ՀՀ Էն զբոսաշրջության մարքեթինգի և խթանման վարչության պետ Դիանա Կարապետյանի, փառատոնի կազմակերպիչ, «Բացահայտիր Հայաստանը երկնքից» օդագնացության միջազգային փառատոնի կազմակերպիչ, «Սքայբոլ» ընկերության տնօրեն Նաիրի Բարսեղյանի ասուլիսը։ Թեմա. Հայաստանի արկածային տուրիզմի հնարավորությունները. հոկտեմբերի 12-16-ը անցկացվելու է «Բացահայտիր Հայաստանը երկնքից» օդագնացության միջազգային փառատոնը։
ԲՈՒՀ-եր, կրթական հաստատություններ
Ժամը 11:30-ին ԵՊՀ Պալեանների անվան դահլիճում կմեկնարկի «Հայագիտության արդի խնդիրները և զարգացման հեռանկարները» խորագրով միջազգային եռօրյա գիտաժողովը՝ նվիրված ԵՊՀ պատմության ֆակուլտետի հիմնադրման 105-ամյակին։ Գիտաժողովին զեկուցումներով հանդես կգան շուրջ 100 մասնակիցներ ինչպես ՀՀ, այնպես էլ օտարերկրյա առաջատար գիտահետազոտական հաստատություններից։
Մշակույթ
Ժամը 11:00-ին Հովհաննես Թումանյանի թանգարանում կկայանա Հեքիաթագիտական 14-րդ միջազգային երկօրյա գիտաժողովի բացման արարողությունը: Ողջույնի խոսքեր՝ Հովհ.Թումանյանի թանգարանի տնօրեն Լուսինե Ղարախանյան, Հովհ. Թումանյանի թանգարանի հեքիաթագիտության բաժնի ղեկավար Ալվարդ Ջիվանյան, ջազ դաշնակահար և կոմպոզիտոր Տիգրան Համասյան: Հիմնական զեկուցողներ՝ բրիտանացի ճանապարհորդ, գրող Նիքոլաս Ջաբեր, Օլսթերի (Հյուսիսային Իռլանդիա) համալսարան Մաքսիմ Ֆոմին, ԵՊՀ, ՀՀ ԳԱԱ հնագիտության և ազգագրության ինստիտուտ Թամար Հայրապետյան:
Ժամը 14:00-ին ՀԳՄ կլոր սրահում տեղի կունենա բանաստեղծ, թարգմանիչ Շանթ Մկրտչյանի «Կոնտրապունկտ» բանաստեղծությունների ժողովածուի քննարկումը:
Ժամը 18:30-ին Հայաստանի ազգային պատկերասրահում (մուտքը Արամի փողոցից) կկայանա Հենրիկ Սիրավյանի 95-ամյա և Սերգեյ Փարաջանովի 100-ամյա հոբելյաններին նվիրված «Սիրավյանի Փարաջանովը» ցուցահանդեսի բացումը։
Ժամը 18:30-ին Խաչատուր Աբովյանի տուն-թանգարանում տեղի կունենա «Առաջինը՝ Նոյից հետո» խորագրով միջոցառում՝ նվիրված Արարատյան վերելքի 195-ամյակին: 1829 թվականի սեպտեմբերի 27-ին Խաչատուր Աբովյանը և Դորպատի համալսարանի պրոֆեսոր Ֆրիդրիխ Պարրոտը համաշխարհային լեռնագնացության պատմության մեջ առաջինը գրավեցին Արարատի գագաթը: Այս վերելքից հետո սկիզբ դրվեց հայ լեռնագնացության պատմությանը:
Ժամը 18:30-ին «Մոսկվա» կինոթատրոնում /Աբովյան 18/ Հայաստանում Ճապոնիայի դեսպանությունը անցկացնում է Ճապոնական ֆիլմերի 18-րդ փառատոնը, որի բացումը տեղի կունենա ժամը 18։30-ին։ Փառատոնը կմեկնարկի Ջո Օդագիրիի «Մի մակույկավարի պատմություն» ֆիլմի ցուցադրությամբ, որն ուղեկցվում է հայ կոմպոզիտոր և դաշնակահար Տիգրան Համասյանի երաժշտությամբ։ ՀՀ-ում Ճապոնիայի դեսպանություն: