4 րոպեի ընթերցում
ԱՆՈՆՍ
20 սեպտեմբեր, 2024
ՀՀ ԱԺ
Ժամը 14:00-ին Ազգային ժողովի 334 դահլիճում «Քաղաքացիական պայմանագիր» խմբակցությունը կազմակերպում է աշխատանքային քննարկում՝ «Էլեկտրական էներգիայի մատակարարման ոլորտում առկա խնդիրները և դրանց լուծման ուղիները թեմայով: Քննարկմանը հրավիրված են Տարածքային կառավարման և ենթակառուցվածքների նախարար Գնել Սանոսյանը և Հանրային ծառայությունները կարգավորող հանձնաժողովի նախագահ Գարեգին Բաղրամյանը: Հանդիպումը բաց է լուսաբանման համար։ Քննարկումը՝ «Քաղաքացիական պայմանագիր» խմբակցության էջում՝ ուղիղ հեռարձակմամբ։
Պետական կառույցներ
Ժամը 9:30-ից «Մերիդիան» էքսպո կենտրոնում իր աշխատանքը կշարունակի Համաշխարհային հայկական երկրորդ գագաթնաժողովը /սեպտեմբերի 17-20/: Գագաթնաժողովին կհյուրընկալի 1000 մասնակցի 55 երկրից:
Մամուլի ակումբներ
Ժամը 13:00-ին Sputnik Արմենիա մուլտիմեդիոն մամուլի կենտրոնում Երևանում կայանալիք մենահամերգին ընդառաջ՝ տեղի կունենա ՀՀ վաստակավոր արտիստ, Չայկովսկու անվան 14-րդ միջազգային մրցույթի հաղթող, թավջութակահար Նարեկ Հախնազարյանի մամուլի ասուլիսը: Ասուլիսին կմասնակցի նաև համերգի հատուկ հյուր, Կալգարիում անցկացվող Էսթեր Հոնենսի անվան դաշնակահարների միջազգային մրցույթի հաղթող, նորվեգական Թրոմսյո քաղաքի 4-րդ միջազգային մրցույթի առաջին մրցանակի դափնեկիր, դաշնակահար Գեորգի Չաիձեն:
Ժամը 14:00-ին Մեդիա կենտրոնում տեղի կունենա մամուլի ասուլիս՝ «Ջերմուկ համայնքի կարիքները, հնարավորություններն ու մարտահրավերները․ համայնքում. ձևավորվել է այլընտրանքային զարգացման աշխատանքային խումբ» թեմայով։ Բանախոսներ՝ Ջերմուկի այլընտրանքային զարգացման աշխատանքային խմբի համակարգող Շիրակ Բունիաթյան, քաղհասարակության զարգացման և ռազմավարական հաղորդակցության փորձագետ Հայկ Աբրահամյան, իրավապաշտպան, համայնքային զարգացման փորձագետ Օլեգ Դուլգարյան:
Մշակույթ
Ժամը 11:00-ին Ազգային գրադարանի թամանյանական փոքր դահլիճում /Տերյան 72/ կկայանա «Հայ-եվրոպական գրական-թարգմանական կապեր» խորագրով հանրային բանախոսություն։ Բանախոս՝ արվեստաբան, գրականագետ Երվանդ Տեր-Խաչատրյան։ Սա Եվրոպական ժառանգության օրերի շրջանակում Հայաստանի ազգային գրադարանի Գրատպության թանգարանի կազմակերպած հերթական միջոցառումն է, որի ընթացքում կարող եք ծանոթանալ նաև թամանյանական մեծ ցուցասրահում բացված եվրոպական գրականության հատընտիր նմուշների ցուցադրությանը։
Ժամը 14:00-ին Հայաստանի ազգային գրադարանի թամանյանական մեծ դահլիճում /Տերյան 72/ տեղի կունենա «Մաեստրո» մշակութային կազմակերպության «Բյուր աստղ» համերգաշարի հերթական համերգը՝ նվիրված անվանի ջութակահար և դիրիժոր Վլադիմիր Սպիվակովի ծննդյան 80-ամյակին և նրա հիմնադրած միջազգային բարեգործական հիմնադրամի 30-ամյակին։ 2024-ի հոկտեմբերին տեղի կունենա Վլադիմիր Սպիվակովի բարեգործական հիմնադրամի «Մոսկվան դիմավորում է բարեկամներին» XXI փառատոնը: Մեր համերգի մասնակիցներն այն պատանի երաժիշտներն ու նկարիչներն են, որոնք հոկտեմբերին մեկնելու են Մոսկվա ներկայացնելու Հայաստանը «Մոսկվան դիմավորում է բարեկամներին» փառատոնին:
ԲՈՒՀ-եր, կրթական հաստատություններ
ժամը 10։00-ին, ԵՊՀ Պալեանների անվան դահլիճում կմեկնարկի «Լեռնային Ղարաբաղի փախստականների իրավունքները» խորագրով աշխատաժողովը։ Միջոցառմանը զեկուցումներով հանդես կգան ԵՊՀ պրոֆեսորադասախոսական կազմի և ՀԿ ներկայացուցիչներ։ Զեկուցմամբ հանդես է գալու նաև ԱԺ պատգամավոր, «Գարդման-Շիրվան-Նախիջևան» համահայկական միության նախագահ Վիլեն Գաբրիելյանը։