Պուտինը հանդիպում է ունեցել Չինաստանի արտգործնախարար Վան Իի հետ
1 րոպեի ընթերցում
![Պուտինը հանդիպում է ունեցել Չինաստանի արտգործնախարար Վան Իի հետ](http://armenpress.am/resized/480/storage/images/articles/2024/09/12/K3GCDZCSf3UyE0WiS8xs6CDwXiieNsb58JxzL0ru.webp)
ԵՐԵՎԱՆ, 12 ՍԵՊՏԵՄԲԵՐԻ, ԱՐՄԵՆՊՐԵՍ։ ՌԴ նախագահ Վլադիմիր Պուտինը Սանկտ Պետերբուրգի Կոնստանտինովյան պալատում հանդիպում է ունեցել Չինաստանի արտգործնախարար Վան Իի հետ։ «Արմենպրես»-ի փոխանցմամբ՝ այս մասին հաղորդում է «Ինտերֆաքս» գործակալությունը։
Պուտինն ընդգծել է Մոսկվայի և Պեկինի հարաբերությունների բավական հաջող զարգացումը։
«Ինչ վերաբերում է երկկողմ հարաբերություններին, ապա դրանք շատ հաջող են զարգանում, ընդ որում, բոլոր ուղղություններով։ Դա վերաբերում է մեր աշխատանքի համակարգմանը միջազգային ասպարեզում, դա վերաբերում է տնտեսական փոխգործակցության, մշակութային և հումանիտար ոլորտի հետ կապված հարցերին», - ասել է ՌԴ նախագահը։
Նա հավելել է, որ երկու երկրների հարաբերությունների զարգացումը կքննարկի Չինաստանի նախագահ Սի Ծինփինի հետ հոկտեմբերին Կազանում կայանալիք ԲՐԻԿՍ-ի գագաթնաժողովի ընթացքում։
«Այդ ամենը մնում է մեր օրակարգում և, ի թիվս այլ բաների, լինելու է ՉԺՀ նախագահի հետ մեր քննարկումների առարկան Կազանում բազմակողմ և երկկողմ հանդիպումների ժամանակ», - նշել է Վլադիմիր Պուտինը։
Պուտինի և Վան Իի բանակցություններին ռուսական կողմից մասնակցում է Ռուսաստանի անվտանգության խորհրդի քարտուղար Սերգեյ Շոյգուն։