Հրազդանի կիրճում իրականացվեցին մաքրման աշխատանքներ․ շաբաթօրյակին մասնակցեց նաև Երևանի քաղաքապետը
2 րոպեի ընթերցում
![Հրազդանի կիրճում իրականացվեցին մաքրման աշխատանքներ․ շաբաթօրյակին մասնակցեց նաև Երևանի քաղաքապետը](http://armenpress.am/resized/480/storage/images/articles/2024/08/24/GgkJbz2wtocjghQncTbVX8RAXhTJ5S0eag92k07p.webp)
ԵՐԵՎԱՆ, 24 ՕԳՈՍՏՈՍԻ, ԱՐՄԵՆՊՐԵՍ: Երևանի քաղաքապետարանի և «Գրին գրին» շարժման նախաձեռնությամբ տարածքի մաքրման աշխատանքներ են իրականացվել Հրազդանի կիրճի հատվածներից մեկում:
«Արմենպրես»-ի հաղորդմամբ՝ շաբաթօրյակային միջոցառմանը ներգրավվել են նաև համայնքային կառույցների և կամավորական ընկերությունների ավելի քան 300 ներկայացուցիչներ:
Աղբից և մարդկանց տեղաշարժին խանգարող ավելորդ բուսականությունից մաքրվել է Կիևյան և Հաղթանակի կամուրջների միջև ընկած տարածքը: Աշխատանքներին ներգրավված էին նաև տեխնիկական միջոցներ, իսկ մասնակիցների թվում էին Երևանի քաղաքապետ Տիգրան Ավինյանը և նրա ղեկավարած կառույցի պատասխանատու պաշտոնյաներ:
Հատվածներից մեկը տեսքի բերելուց հետո Տիգրան Ավինյանը լրագրողներին ներկայացրեց միջոցառմանն առնչվող որոշ մանրամասներ:
«Երևանի քաղաքապետարանը, մայրաքաղաքի վարչական շրջանների կառույցները միացել են «Գրին գրին» շարժման նախաձեռնությանը՝ Հրազդանի կիրճի մաքրման աշխատանքներին: Այն շուտով ճանաչվելու է ռեկրեացիոն (հանգստի կազմակերպման-խմբագր.) գոտի: Հրազդանի կիրճը մեր քաղաքի ամենակարևոր կանաչ տարածքներից մեկն է, որի այսքան աղտոտված լինելը մեր մեծագույն խնդիրն է: Ըստ այդմ, աջակցում ենք նաև «Գրին գրին» կազմակերպությանը, որը համանման տարբեր նախաձեռնություններ է իրականացնում Երևան քաղաքում: Առաջնային խնդիրը ոչ այնքան աղբահավաքությունն է, որքան մարդկանց իրազեկումն այն մասին, որ նման վայրերում, առհասարակ, տարբեր տեղերում աղբ թափելը պարզապես անթույլատրելի է: Հուսով եմ՝ երևանցիները հենց այս իմաստով կընկալեն և կհասկանան սույն նախաձեռնությունը»,- նշեց Տիգրան Ավինյանը:
Քաղաքապետը տեղեկացրեց նաև, որ իրենք պարբերաբար նախաձեռնում են նմանատիպ միջոցառումներ կամ միանում այդ նպատակին միտված նախաձեռնություններին: