Հրազդան-Հանքավան ավտոճանապարհին հայտնաբերվել է ՌԴ քաղաքացու դի. ՔԿ-ն մանրամասներ է հայտնում
2 րոպեի ընթերցում
![Հրազդան-Հանքավան ավտոճանապարհին հայտնաբերվել է ՌԴ քաղաքացու դի. ՔԿ-ն մանրամասներ է հայտնում](http://armenpress.am/resized/480/storage/images/articles/2024/08/21/grS7ikUcnAAnfAlK2eZNalA4wE5B9XTn7QTaBXg0.webp)
ԵՐԵՎԱՆ, 21 ՕԳՈՍՏՈՍԻ, ԱՐՄԵՆՊՐԵՍ։ Հայաստանի Հանրապետության Կոտայքի մարզում ՌԴ 20-ամյա քաղաքացու անհետ կորելու, ապա նրա դին հայտնաբերվելու դեպքի առնչությամբ քրեական վարույթ է նախաձեռնվել․ հանգամանքները պարզվում են։
«Արմենպրես»-ի փոխանցմամբ՝ այս մասին հայտնել են ՀՀ քննչական կոմիտեից՝ մանրամասներ ներկայացնելով դեպքից:
«2024 թ․ օգոստոսի 20-ին ՀՀ քննչական կոմիտեի Կոտայքի մարզային քննչական վարչություն է ստացվել ՌԴ քաղաքացու՝ ՀՀ ՆԳՆ ոստիկանության բաժնում տված հաղորդումն այն մասին, որ նույն օրը, ժամը 10-ի սահմաններում, երկու ընկերոջ հետ գնացել են Կոտայքի մարզի Ծաղկաձոր համայնքի Հանքավան բնակավայր՝ հեծանիվ վարելու, և հետ վերադառնալիս իր ընկերներից մեկը՝ Մարկ Լարինը, Հանքավան բնակավայրից մինչև Արտավազ բնակավայր ճանապարհին կորել է։
Մարդու անհետ կորելու վերաբերյալ պատշաճ հաղորդման առթիվ նախաձեռնվել է քրեական վարույթ:
Օգոստոսի 21-ին վարույթն իրականացնող մարմինը տեղեկացվել է, որ որոնողական աշխատանքների արդյունքում 2002 թ․ ծնված Մ․ Լարինի դին հայտնաբերվել է Հրազդան-Հանքավան ավտոճանապարհին՝ ջրամբարի մոտակայքում»,- նշված է Կոմիտեի տարածած հաղորդագրության մեջ:
Դիակի արտաքին զննությամբ, նախնական տվյալներով, մարմնի վրա բռնության տեսանելի հետքեր չեն հայտնաբերվել։ Մահվան պատճառները պարզելու նպատակով նշանակվել է դատաբժշկական փորձաքննություն։
Իրականացվում են անհրաժեշտ քննչական և վարութային գործողություններ դեպքի հանգամանքները պարզելու նպատակով։