Գետերի մաքրման նպատակով նոր կայան և նոր սարքեր են տեղադրվում
1 րոպեի ընթերցում
![Գետերի մաքրման նպատակով նոր կայան և նոր սարքեր են տեղադրվում](http://armenpress.am/resized/480/storage/images/articles/2024/08/21/47BBxm9QCBj3jah4GBdxuwqRJERtFCkzpFHuJVVH.webp)
ԵՐԵՎԱՆ, 21 ՕԳՈՍՏՈՍԻ, ԱՐՄԵՆՊՐԵՍ: Խոշոր տրամաչափի աղբի կուտակումից խուսափելու համար Երևանի քաղաքապետարանի տարեկան ծրագրով նախատեսվել էր Հրազդան գետի վրա կառուցել աղբաորսիչ սարքեր: «Արմենպրես»-ի փոխանցմամբ՝ Քաղաքապետարանից հայտնում են, որ Շենգավիթ վարչական շրջանի հատվածում հարմարանքների տեղադրումն արդեն ավարտական փուլում է:
Առաջիկայում աղբաորսիչներ կկառուցվեն նաև Դավթաշեն և Կիևյան կամուրջների միջանկյալ հատվածում:
Միևնույն ժամանակ Գետառի վրա կառուցվում է ջրի մաքրման կայան, որն իր տեսակով առաջինն է մայրաքաղաքում: Կայանը նաև զտում է ջուրը, որի շնորհիվ կեղտաջուրը չի հասնում Հրազդան գետ:
«Այսպիսով՝ կոշտ կենցաղային աղբը, կեղտաջուրն այլևս չեն լցվի Երևանյան լիճ»,- նշված է Երևանի քաղաքապետարանի տարածած հաղորդագրության մեջ: