Բայդենը Նեթանյահուի հետ քննարկել է ԱՄՆ նոր ռազմական տեղակայումները՝ Իսրայելին աջակցելու համար
2 րոպեի ընթերցում
![Բայդենը Նեթանյահուի հետ քննարկել է ԱՄՆ նոր ռազմական տեղակայումները՝ Իսրայելին աջակցելու համար](http://armenpress.am/resized/480/storage/images/articles/2024/08/02/9n2y2fPFQcpw1o4VrnWLwVAdM0IPErtgjjHdt2JQ.webp)
ԵՐԵՎԱՆ, 2 ՕԳՈՍՏՈՍԻ, ԱՐՄԵՆՊՐԵՍ։ ԱՄՆ նախագահ Ջո Բայդենը դիտարկում է ամերիկյան նոր պաշտպանական հնարավորությունների տեղակայումը Մերձավոր Արևելքում, որտեղ իրավիճակը լարվել է Թեհրանում ՀԱՄԱՍ-ի ղեկավարի սպանությունից և Իրանի կողմից վրեժի խոստումներից հետո։
«Արմենպրես»-ի փոխանցմամբ՝ ԱՄՆ նախագահն Իսրայելի վարչապետ Բենիամին Նեթանյահուի հետ հեռախոսազրույցի ընթացքում ասել է, որ կաջակցի Իսրայելի պաշտպանությանը, այդ թվում՝ նոր տեղակայումների միջոցով։
«Նախագահը վերահաստատել է իր հանձնառությունն Իսրայելի անվտանգությանը՝ ընդդեմ Իրանից եկող բոլոր սպառնալիքների, այդ թվում՝ պրոքսի ահաբեկչական խմբավորումների՝ ՀԱՄԱՍ-ի, Հեզբոլլահի և հութիների։ Նախագահը քննարկել է ջանքերն՝ աջակցելու սպառնալիքների, այդ թվում՝ բալիստիկ հրթիռների և անօդաչուների դեմ Իսրայելի պաշտպանությանը, որը կներառի ԱՄՆ նոր պաշտպանական ռազմական տեղակայումներ», - գրում է Սպիտակ տան մամուլի ծառայությունը։
Թե կոնկրետ ինչ նոր տեղակայումների մասին է խոսքը, ԱՄՆ նախագահը չի նշել, սակայն ավելի վաղ տեղեկություններ էին տարածվել, որ ԱՄՆ-ն 12 ռազմանավ է կենտրոնացրել Մերձավոր Արևելքի տարածաշրջանում։
Հեռախոսազրույցից հետո Բայդենը լրագրողներին հայտնել է, որ ԱՄՆ-ն շատ մտահոգված է Մերձավոր Արևելքում լարվածության սրմամբ։ Նա ընդգծել է հրադադար կնքելու կարևորությունը՝ միևնույն ժամանակ նշելով, որ ՀԱՄԱՍ-ի քաղբյուրոյի ղեկավար Իսմայիլ Հանիյեի սպանությունը դրան չի նպաստում։
Իրանը խոստացել է «կոպիտ և ցավոտ» պատասխան տալ Հանիյեի սպանությանը։ Իսրայելը ո՛չ ընդունել է, ո՛չ հերքել իր առնչությունը դրան։