Ջո Բայդենը հայտնել է ԱՄՆ նախագահի պաշտոնի համար ընտրապայքարից դուրս գալու մասին
1 րոպեի ընթերցում
![Ջո Բայդենը հայտնել է ԱՄՆ նախագահի պաշտոնի համար ընտրապայքարից դուրս գալու մասին](http://armenpress.am/resized/480/storage/images/articles/2024/07/21/hlCerf2NfpC4pRmxQdDH8kOJgHH3Wz70J7fqJV2g.webp)
ԵՐԵՎԱՆ, 21 ՀՈՒԼԻՍԻ, ԱՐՄԵՆՊՐԵՍ։ Միացյալ Նահանգների գործող նախագահ Ջո Բայդենն այլևս չի պայքարի ԱՄՆ նախագահի պաշտոնը զբաղեցնելու համար։ «Արմենպրես»-ի փոխանցմամբ, ընտրապայքարից դուրս գալու որոշման մասին նա հայտնել է X սոցիալական ցանցի իր էջում հրապարակված նամակում։
ԱՄՆ 46-րդ նախագահը նամակում մասնավորապես նշել է. «Թեպետ ես մտադիր էի վերընտրվել, սակայն հավատացած եմ, որ իմ կուսակցության ու երկրի շահերից է բխում, որ դուրս գամ ընտրապայքարից ու կենտրոնանամ միայն պաշտոնավարմանս մնացած ժամանակահատվածում նախագահի իմ պարտականությունները կատարելու վրա»։
Բայդենը հայտնել է նաև, որ նախագահի պաշտոնի համար պայքարում սատարում է գործող փոխնախագահ Կամալա Հարիսի թեկնածությունը։
Հունիսի վերջին Թրամփի հետ Բայդենի անհաջող բանավեճից հետո Բայդենի ընտրարշավի մի շարք դոնորներ և դեմոկրատ կոնգրեսականներ սկսել էին կոչ անել 81-ամյա նախագահին չառաջադրվել երկրորդ ժամկետով։ Բայդենը խոստացել է առաջիկայում հատուկ ուղերձով դիմել ժողովրդին։
ԱՄՆ նախագահի ընտրությունները տեղի կունենան 2024 թվականի նոյեմբերին։
— Joe Biden (@JoeBiden) July 21, 2024