ԵՐԵՎԱՆ, 3 ՀՈՒԼԻՍԻ, ԱՐՄԵՆՊՐԵՍ: Երևանի «Ոսկե ծիրան» միջազգային կինոփառատոնը, որն անցկացվելու է հուլիսի 7-14-ը, շարունակում է համագործակցել միջազգային կազմակերպությունների և Երևանում հավատարմագրված դեսպանատների հետ և համատեղ մի շարք հետաքրքիր ծրագրեր իրականացնել:
«Արմենպրես»-ի հաղորդմամբ՝ հուլիսի 3-ին լրագրողների հետ հանդիպմանը կինոփառատոնի համահիմնադիր, միջազգային ծրագրերի ղեկավար Սուսաննա Հարությունյանը տեղեկացրեց, որ Երևանում Գյոթե կենտրոնի հետ համատեղ կիրականացվի «Արտադրված է Գերմանիայում» ծրագիրը։ «Երևանյան պրեմիերաներ» ծրագրում կցուցադրվեն Անդրեաս Դրեզենի «Հիլդեից՝ սիրով», Սևերին Ֆիալայի և Վերոնիկա Ֆրանցի «Դիվային լոգանքը», Վիկտոր Կոսակովսկու «Արխիտեկտոն», Ավիվա Բարխուդարյանի «Վիգենը, Բեռլինը և սառը պատերազմը» ֆիլմերը։
Նիդերլանդների Թագավորության դեսպան Յաբ Ֆրեդերիկսը 2023 թվականին է ստանձնել Երևանում դեսպանի պարտավորությունները և ցավով է նշում, որ Հայաստան է եկել այն ժամանակ, երբ «Ոսկե ծիրան» կինոփառատոնը եզրափակվել է: «Հաճախ էի հարցնում, թե ինչ կարևոր մշակութային միջոցառումներ են անցկացվում Հայաստանում, բոլորը պատասխանում էին՝ «Ոսկե ծիրան» փառատոնն է կազմակերպվում: Կարծում եմ՝ սա պարզապես փառատոն չէ, այլ Հայաստանի մշակութային պատուհանն է դեպի աշխարհ»,-ասաց նա:
Դեսպանատունն արդեն չորրորդ տարին է՝ ֆինանսավորում է փառատոնի ընթացքում լույս տեսնող օրաթերթի տպագրությունը:
Հայաստանի ֆրանսիական ինստիտուտի տնօրեն և Ֆրանսիայի դեսպանատան մշակութային կցորդ Դեյվիդ Տուրցը հավաստիացրեց, որ իրենց համար մեծ պատիվ է ամեն տարի համագործակցել կինոփառատոնի հետ: ««Ոսկե ծիրան»-ը ժամանակի ընթացքում մեծ հաջողությունների է հասել, հեղինակություն է ձեռք բերել: Փառատոնը հնարավորություն է տալիս երիտասարդ արվեստագետներին, կինոգործիչներին համաշխարհային մասշտաբով ճանաչում ձեռք բերել, ներկայանալի դառնալ, Հայաստան հրավիրել հանրահայտ կինոգործիչների տարբեր ծրագրեր իրականացնելու համար»,-ընդգծեց նա:
Փառատոնին կցուցադրվեն Բերտրան Բոնելլոյի «Գազանը», Դավիդ Բոարետոյի «Ապրիլը Ֆրանսիայում», Ալեքսի Պազումյանի «Սև այգի», Կատիա Կիրակոսյանի «Միսաք և Մելինե Մանուշյաններ» ֆիլմերը, իսկ հուլիսի 10-ին «Ֆրանսիական կինոյի օր» ավանդական միջոցառմանը կցուցադրվի այս տարվա Բեռլինի կինոփառատոնում «Ոսկե արջ»-ի արժանացած Մատի Դիոպի «Դահոմե» ֆիլմը։
Դեսպանության և ինստիտուտի հետ համագործակցությամբ Հայաստան կժամանեն փառատոնի ժյուրիի անդամ Գրիգոր Պըլտյանը, ինչպես նաև ռեժիսորներ Դավիդ Բոարետոն, Ալեքսի Պազումյանը և Կատիա Կիրակոսյանը։
«Ոսկե ծիրան» կինոփառատոնի ֆիլմերը ցուցադրվելու են Կինոյի տանը, Մալյանի անվան թատրոնում և «Մոսկվա» կինոթատրոնում: