Ռուսաստանը չի խանգարում ԱՄՆ-ի դիվանագիտական ջանքերին՝ ուղղված Հայաստանի և Ադրբեջանի միջև հարաբերությունների կարգավորմանը․ Միլլեր
1 րոպեի ընթերցում
![Ռուսաստանը չի խանգարում ԱՄՆ-ի դիվանագիտական ջանքերին՝ ուղղված Հայաստանի և Ադրբեջանի միջև հարաբերությունների կարգավորմանը․ Միլլեր](http://armenpress.am/resized/480/static/news/b/2024/01/1127386.jpg)
ԵՐԵՎԱՆ, 5 ՀՈՒՆՎԱՐԻ, ԱՐՄԵՆՊՐԵՍ։ ԱՄՆ-ն կշարունակի իր դիվանագիտական ջանքերը Հայաստանի և Ադրբեջանի միջև հարաբերությունների կարգավորման ուղղությամբ, և Ռուսաստանը չի խոչընդոտում այդ գործընթացին։ «Արմենպրես»-ի փոխանցմամբ՝ այս մասին հայտնել է ԱՄՆ պետքարտուղարության խոսնակ Մեթյու Միլլերը ճեպազրույցի ժամանակ։
«Ռուսաստանը որևէ կերպ չի խոչընդոտում մեզ՝ իրականացնելու կարևոր դիվանագիտական ջանքերը, որոնք, ըստ մեզ, անհրաժեշտ են Հայաստանի և Ադրբեջանի համար, և մենք կշարունակենք հետամուտ լինել դրանց», - ասել է Միլլերը՝ մեկնաբանելով Ռուսաստանի այն հայտարարությունները, որ այլ պետությունները չպետք է միջամտեն հայ-ադրբեջանական խաղաղության գործընթացին։
Ինչ վերաբերում է Հայաստանի և Ադրբեջանի արտգործնախարարների միջև Վաշինգտոնում ԱՄՆ պետքարտուղարի նախատեսած հանդիպմանը, Միլլերը նշել է, որ համապատասխան հայտարարություն կարվի, երբ նման հանդիպման ժամկետները հայտնի լինեն։