388.33
Հայաստանի կառավարության պլանների մեջ է Ադրբեջանի հետ խաղաղության պայմանագրի ստորագրումն ու Թուրքիայի հետ հարաբերությունների կարգավորումը․ Փաշինյան
2 րոպեի ընթերցում
ԵՐԵՎԱՆ, 30 ՀՈԿՏԵՄԲԵՐԻ, ԱՐՄԵՆՊՐԵՍ։ Հայաստանի վարչապետ Նիկոլ Փաշինյանը հայտարարել է, որ Հայաստանի իշխանության պլանների մեջ է Ադրբեջանի հետ խաղաղության ու հարաբերությունների կարգավորման պայմանագիր ստորագրելը, ինչպես նաև Թուրքիայի հետ հարաբերությունների կարգավորումը։
«Մեր պլանների մեջ է Ադրբեջանի հետ խաղաղության և հարաբերությունների կարգավորման պայմանագիր ստորագրելը և Թուրքիայի հետ հարաբերությունների կարգավորումը։ Որքան էլ գիտակցում ենք, որ դա հեշտ չի լինելու, բայց նման ծրագրով առաջ շարժվելը բխում է Հայաստանի Հանրապետության պետական շահերից»,- «Արմենպրես»-ի հաղորդմամբ՝ նշեց Փաշինյանը։
Վարչապետի խոսքով՝ փլուզվող աշխարհակարգում Հայաստանի անվտանգության ապահովման միակ գործիքը հայրենիքի նույնականացումն է պետության, նրա տարածքի, միջազգայնորեն ճանաչված սահմանների, տարածքային ամբողջականության հետ։
«Այս ընկալումից բխող առանցքային, գործնական խնդիրը, որքան էլ տարօրինակ հնչի, պետության աշխարհագրական տեղադիրքի գիտակցումն է, և կարևոր եմ համարում արևելք-արևմուտք, հյուսիս-հարավ գլոբալ քննարկումից առաջ գիտակցել, որ մենք գտնվում ենք հարավկովկասյան տարածաշրջանում, ունենք չորս հարևաններ և նրանց հետ հարաբերությունների մեջ են թաքնված այն բոլոր հիմնական սպառնալիքներն ու հնարավորությունները, որ մենք կարող ենք ունենալ։ Այս առումով կարևոր է նաև Վրաստանի և Իրանի Իսլամական Հանրապետության հետ հարաբերությունների բարեկամական, համագործակցային բնույթի հետագա խորացումը»,- ընդգծեց Փաշինյանը։
