Դելիմիտացիայի գործընթացում կոնկրետ քարտեզներով կարձանագրվեն սահմանի խախտումները, որոնք պետք է վերացվեն. Նիկոլ Փաշինյան
1 րոպեի ընթերցում
ԵՐԵՎԱՆ, 10 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի վարչապետ Նիկոլ Փաշինյանն անդրադարձել է հարցին, թե արդյոք Գրանադայի քառակողմ հանդիպման արդյունքներով ընդունված հայտարարությունը չեզոքացրել է Ադրբեջանի կողմից սպառնացող վտանգները, և արդյոք Ադրբեջանը իր զորքերը դուրս կհանի Հայաստանի օկուպացված տարածքներից։
«Արմենպրես»-ի հաղորդմամբ՝ Փաշինյանն այս մասին ասաց Հայաստանի հանրային հեռուստատեսությանը տված հարցազրույցում։
«Երբ դելիմիտացիայի հիմքում դրվում են կոնկրետ քարտեզներ, արձանագրվում են սահմանի խախտումները, ինչը նշանակում է, որ դելիմիտացիայի պրոցեսում այդ խախտումները պետք է վերացվեն։ Հիմա պրոբլեմն այն է, որ այս ձևակերպման տակ չկա Ադրբեջանի ստորագրությունը, բայց մյուս կողմից առնվազն արևմտյան տիրույթում ձևավորվել է արդեն պաշտոնական ըմբռնում, որ սա պետք է լինի հիմքն ապագա խաղաղ կարգավորման»,-նշեց Նիկոլ Փաշինյանը: