Հայ-ադրբեջանական բանակցությունների ամենակարևոր հարցերում առաջընթաց չկա․ ԱԽ քարտուղար

ԵՐԵՎԱՆ, 9 ՄԱՅԻՍԻ, ԱՐՄԵՆՊՐԵՍ։ Հայաստանի և Ադրբեջանի միջև բանակցությունների ամենակարևոր հարցերում առաջընթաց չկա․ այդ հարցերը վերաբերում են Հայաստանի Հանրապետության սուվերեն 29 հազար 800 քառակուսի կիլոմետր տարածքի արձանագրմանը, Ստեփանակերտ-Բաքու բանակցությունների միջազգային մեխանիզմի, ինչպես նաև միջազգային երաշխիքների ստեղծմանը։ «Արմենպրես»-ի փոխանցմամբ` այս մասին մայիսի 9-ին լրագրողների հետ ճեպազրույցում հայտարարեց Հայաստանի Անվտանգության խորհրդի քարտուղար Արմեն Գրիգորյանը։

«Այսօր մեզ չի հաջողվում նույնիսկ նոյեմբերի 9-ի եռակողմ հայտարարության տարրերի պահպանումը, քանի որ, օրինակ, Լաչինի միջանցքում, ըստ եռակողմ հայտարարության, Ադրբեջանը չպետք է ներկա լինի, բայց ներկա է այս պահին։ Մեզ համար շատ կարևոր է, որ ունենանք միջազգային երաշխիքների կամ երաշխավորների ինստիտուտ, որով կլուծենք նման հարցերը։ Այսինքն, բոլորը հավատարիմ կմնան բոլոր պայմանավորվածություններին»,- ասաց Գրիգորյանը։

Անդրադառնալով Վաշինգտոնում կայացած հայ-ադրբեջանական վերջին բանակցություններին` Գրիգորյանը չբացեց փակագծերը՝ նկատելով միայն, որ թեպետ որոշ հարցերում որոշակի առաջընթաց գրանցվել է, սակայն դրանք ամենահիմնարար հարցերը չեն։

Անվտանգության խորհրդի քարտուղարը հիշեցրեց, որ առաջիկայում՝ մայիսի 14-ին ակնկալվում է Հայաստանի վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի հանդիպումը Բրյուսելում, ինչին հաջորդելու է հունիսի 1-ին՝ արդեն նաև Գերմանիայի կանցլեր Օլաֆ Շոլցի և Ֆրանսիայի նախագահ Էմանուել Մակրոնի մասնակցությամբ հանդիպում Քիշնևում։ «Կփորձենք աշխատել այն ուղղությամբ, որպեսզի հնարավորինս մոտարկենք մոտեցումներն ու առաջ շարժվենք»,- ասաց Գրիգորյանը։

Նա անտեղին համարեց Թուրքիայի արտգործնախարար Մևլութ Չավուշօղլուի հայտարարությունը Երևանում «Նեմեսիս» գործողության հեղինակներին նվիրված հուշարձանի բացման առնչությամբ՝ նշելով․ «Դա Հայաստանի ներքին հարցն է, և որևէ մեկն իրավունք չունի այդ հարցին խառնվելու»։ Արմեն Գրիգորյանը վերահաստատեց նաև Հայաստանի դիրքորոշումը Թուրքիայի հետ հարաբերությունների կարգավորման գործում, որն է՝ կարգավորել հայ-թուրքական հարաբերություններն առանց նախապայմանների։