Կիրականացվի կլիմայակայուն գյուղատնտեսության կարողությունների բազմամակարդակ ինտեգրացված զարգացման ծրագիրը

ԳՅՈՒՄՐԻ, 15 ՀՈՒՆՎԱՐԻ, ԱՐՄԵՆՊՐԵՍ: Տավուշի, Շիրակի և Լոռու մարզերում իրականացվելու է կլիմայակայուն գյուղատնտեսության կարողությունների բազմամակարդակ ինտեգրացված զարգացման ծրագիրը:

Ծրագիրն առաջիկա 3 տարում իրականացնելու են «Կանաչ արահետ» և «Հույսի նշան» կազմակերպությունները՝ Գերմանիայի Դաշնային Հանրապետության տնտեսական համագործակցության և զարգացման նախարարության ֆինանսական աջակցությամբ։ Ինչպես «Արմենպրես»-ին տեղեկացրին Շիրակի մարզպետարանի տեղեկատվության ու հասարակայնության հետ կապերի բաժնից, Շիրակի մարզպետ Նազելի Բաղդասարյանը հունվարի 14-ին ընդունել է «Կանաչ արահետ» գյուղատնտեսության աջակցության հասարակական կազմակերպության ներկայացուցիչներին։ Հանդիպման ընթացքում մարզպետը, կարևորելով ծրագիրը, համագործակցության ու աջակցության պատրաստակամություն է հայտնել:

Նշենք, որ ծրագրի նպատակն է ՀՀ հյուսիսային մարզերի գյուղական համայնքներում մեղմել աղքատությունը՝ նորարար, կայուն և կլիմայի փոփոխություններին հարմարվող գյուղատնտեսական գործելակերպերի ներդրման միջոցով։ Ծրագրով կթիրախավորվեն խոցելի խմբերը։ Ծրագրի վերջնարդյունքների ցուցանիշներով նախատեսվում է 3 մարզերի 6 բնակավայրերի 280 փոքր ֆերմերային տնտեսությունների ան գործունեությունից եկամուտներն ավելացնել 20%-ով։ Ծրագիրը կաջակցի ավելի քան 360 փոքր տնտեսությունների, որոնց առնվազն 50%-ը կանայք են՝ գիտելիքների տարածման ու շուկայավարման հարցերում համագործակցության բարելավման և նոր ու կայուն գյուղատնտեսական մեթոդների կիրառման միջոցով ավելացնելու եկամուտները՝ հաշվի առնելով կլիմայի փոփոխության մարտահրավերները:

Արմենուհի Մխոյան