3 րոպեի ընթերցում
ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ: Ալեքսանդր Սպենդիարյանի 150-ամյա հոբելյանի առթիվ կոմպոզիտորի տուն-թանգարանը հրատարակել է դիրիժոր Գեորգի Բուդաղյանի «Դիտարկումներ Ա. Ա. Սպենդիարովի «Ալմաստ» օպերայի գործիքավորման շուրջ» գիրքը, որը դիրիժորը գրել է՝ տասնամյակներ շարունակ ղեկավարելով և ուսումնասիրելով «Ալմաստ» օպերան:
«Արմենպրես»-ի հաղորդմամբ՝ գիրքը երաժշտասեր հանրության ուշադրությանը ներկայացվեց հունիսի 28-ին Ալ. Սպենդիարյանի տուն-թանգարանում:
Գլխավոր խմբագիր, ՀՀ արվեստի վաստակավոր գործիչ, արվեստագիտության թեկնածու, ԵՊԿ պրոֆեսոր Ալինա Փահլևանյանն ասաց, որ այն երկար սպասված հրատարակություն է: «1968 թվականից աշխատանքը պատրաստ է եղել և հանձնվել է տուն-թանգարանի հոգածությանը: Սա շատ կարևոր գիրք է, որովհետև հեղինակը մեծ մասնագետ է, մեր լավագույն դիրիժորներից է, տաղանդավոր երաժշտագետ, հայրենասեր մարդ: Այս աշխատանքը կարող է դառնալ սեղանի գիրք ուսանողների համար, որոնք պետք է ուսումնասիրեն գործիքագիտություն, գործիքավորում, ծանոթանան Սպենդիարյանի վարպետության գաղտնիքներին»,-նշեց Փահլեվանյանը:
Խմբագրի խոսքով՝ «Դիտարկումներ Ա. Ա. Սպենդիարովի «Ալմաստ» օպերայի գործիքավորման շուրջ» գիրքը նուրբ դիտարկումներով կատարված աշխատանք է: «Բուդաղյանը պարտիտուրի ամեն մի նոտան ու հատվածը շատ լավ գիտեր և նշում է, թե Սպենդիարյանը գործիքավորման ինչ միջոցներով է հասնում առավել արտահայտիչ լինելուն, ինչպես է կարողանում զուգորդել տարբեր գործիքներ, որ ստանա զուռնայի հնչողություն: Բուդաղյանը գրքում գրում է, որ «Պարսկական քայլերգ»-ը գործիքավորման 33 տարբերակ ունի»,-պատմեց Ալինա Փահլեվանյանն ու հիշեցրեց, որ Բուդաղյանը շատ նրբերանգներ է տեսել, որովհետև անգիր գիտեր «Ալմաստ» օպերան, որի առաջին ու փայլուն կատարողն էր:
Տուն-թանգարանի տնօրեն Մարինե Օթարյանն էլ տեղեկացրեց, որ գիրքը լույս է ընծայվել 50 օրինակով: Պահպանվել է ուսումնասիրության լեզուն` ռուսերենը:
«Այն տպագրվել է հիմնականում մասնագետների համար և չի վաճառվում: Գրքերն ունեն հասցեատերեր, որոնք են երաժշտական գրադարանները, օպերային թատրոնների, նվագախմբերի գրադարանները, դիրիժորները, ուսումնական հաստատաությունները: Գրքերը կգնան նաև ՌԴ, Վրաստան և այլ երկրներ»,-նշեց Օթարյանը:
Խոսելով հոբելյանի շրջանակում «Ալմաստ» օպերային ներկայացման վերականգնման մասին՝ տնօրենը շեշտեց, որ ՀՀ ԿԳՄՍ նախարարի տեղակալ Արա Խզմալյանը մի առիթով ասել է, որ այն ներառված է հոբելյանական միջոցառումների ցանկում, սակայն, հաշվի առնելով ծանր ժամանակները, իրագործումը հետաձգվել է: Գուցե կյանքի կոչվի մինչև Սպենդիարյանի ծննդյան օրը՝ նոյեմբերի 1-ը:
Շնորհանդեսը, որին ներկա էին ոլորտի մասնագետներ, հետաքրքրասերներ, ուղեկցվեց Սպենդիարյանի անվան երաժշտական դպրոցի սաների երաժշտական կատարումներով: