Լավրովը մեկնաբանել է ԱՄՆ պետդեպի արձագանքը՝ ԼՂ հիմնահարցի կարգավորմանը ռուսական կողմի մասնակցության վերաբերյալ

ԵՐԵՎԱՆ, 19 ՆՈՅԵՄԲԵՐԻ, ԱՐՄԵՆՊՐԵՍ: Ռուսաստանի արտգործնախարար Սերգեյ Լավրովը չի կարծում, թե Լեռնային Ղարաբաղի հիմնահարցը կարգավորվել է՝ առանց ԱՄՆ-ի և Ֆրանսիայի մասնակցության: «Արմենպրես»-ի հաղորդմամբ՝ Լավրովն այս մասին ասել է RT-ի թղթակից հետ զրուցում՝ մեկնաբանելով ԱՄՆ պետքարտուղարության արձագանքը՝ Լեռնային Ղարաբաղում իրավիճակի լուծմանը ռուսական կողմի մասնակցության վերաբերյալ:

«Նախ, ես չեմ կարծում, որ այն (Ղարաբաղի հարցը) լուծվեց առանց Միացյալ Նահանգների մասնակցության, քանի որ, իհարկե, երեք համանախագահների ՝ Ռուսաստանի, ԱՄՆ-ի և Ֆրանսիայի դիրքորոշումը, որը նոյեմբերի 9-ին ստորագրված փաստաթղթին նախորդող վերջին ամսվա ընթացքում բազմիցս ներկայացվել է ինչպես նախագահների, այնպես էլ նախարարների և համանախագահող երկրների հատուկ ներկայացուցիչների մակարդակով, եղել է հօգուտ արյունահեղության անհապաղ դադարեցման և հրադադարի ռեժիմը վերահսկելու մեխանիզմի մշակման, և քաղաքական առումով, հոգեբանորեն ազդել է իրավիճակի վրա»,-ասել է Լավրովը:

Նրա խոսքով՝ չնայած այն ժամանակ կոչերը չունեին նյութական տեսք, կարևոր քաղաքական դեր են խաղացել պայմաններ ստեղծելու համար, որպեսզի ՌԴ նախագահի ջանքերի շնորհիվ կողմերն ի վերջո համաձայնության հասնեն:

«Մի իրավիճակում, երբ խոսքը բառացիորեն րոպեների մասին էր, որոնցից յուրաքանչյուրն իր գինն ուներ՝ մարդկային կյանքերի տեսքով, զանգահարե՞լ Վաշինգտոն, Փարիզ, պայմանավորվե՞լ այն հարցի շուրջ, թե արդյոք նրանք կսատարեն որոշակի ձևակերպումներ ... »,-նշել է Լավրովն ու կարծիք հայտնել, որ այդպիսի պնդումներ առաջ քաշելը պարզապես սխալ և ոչ էթիկական է:

Ավելի վաղ Պետդեպարտամենտի ներկայացուցիչը հայտարարել էր, որ ԱՄՆ-ն և Ֆրանսիան դեռ շատ հարցեր ունեն Ռուսաստանին՝ հակամարտության կարգավորման համաձայնության, այդ թվում՝ Թուրքիայի դերի վերաբերյալ: Լավրովն էլ ասել էր, որ տարօրինակ է նման բան լսել, քանի որ ամերիկացի գործընկերները տեղեկացված էին պետքարտուղարի տեղակալի մակարդակով:

Նոյեմբերի 9-ին ՌԴ նախագահ Վլադիմիր Պուտինը, Հայաստանի վարչապետ Նիկոլ Փաշինյանը, Ադրբեջանի նախագահ Իլհամ Ալիևը ստորագրել են համատեղ հայտարարություն Լեռնային Ղարաբաղում ռազմական գործողությունները դադարեցնելու հետ կապված: Պատերազմը դադարեցվել է նոյեմբերի 10-ին՝ ժամը 01:00-ից, ռուս խաղաղապահները մուտք են գործել Լեռնային Ղարաբաղ:

Աննա Գրիգորյան