Արցախն ապացուցել է երկրի հասարակական-քաղաքական կյանքը կազմակերպելու իր կարողությունը.Աննա Նաղդալյան
2 րոպեի ընթերցում
ԵՐԵՎԱՆ, 2 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ արտաքին գործերի նախարարի մամուլի խոսնակ Աննա Նաղդալյանն իր ճեպազրույցը սկսեց Արցախի անկախության հռչակման օրվա կապակցությամբ շնորհավորանքով:
«Արմենպրես»-ի փոխանցմամբ՝ Նաղդալյանը նշեց, որ այս տարիների ընթացքում Արցախն ապացուցել է իր կարողությունը՝ կազմակերպելու երկրի հասարակական-քաղաքական կյանքը, ապահովելու իր բնակչության անվտանգությունը, ինչպես նաև՝ ստանձնելու միջազգային պարտավորություններ, հատկապես ժողովրդավարության և մարդու իրավունքների առաջմղման ուղղությամբ:
«Արցախի ժողովուրդը ժողովրդավարական ճանապարհով ընտրված իր իշխանություններին լիազորել է համապատասխան մանդատով՝ ներկայացնելու իր շահերը միջազգային հարթակում և նախ և առաջ՝ խաղաղ գործընթացում: Լիազորել նաև երաշխավորելու Արցախի անվտանգության համակարգի համապարփակությունը, ապահովելու երկրի բնականոն զարգացման և բարգավաճման համար ներքին և արտաքին համապատասխան պայմաններ»,- ասաց Նաղդալյանը:
ԱԳ նախարարի մամուլի խոսնակը նշեց, որ Հայաստանն Արցախի հետ ունի շատ սերտ համագործակցություն՝ տարբեր մակարդակներում:
«Մենք պատրաստակամ ենք ձեռնարկել շարունակական քայլեր՝ այդ համագործակցությունն առավել զարգացնելու ուղղությամբ»,- նշեց Աննա Նաղդալյանը:
Արցախի Հանրապետությունը 29 տարեկան է: 1991թ. սեպտեմբերի 2-ին ժողովրդական պատգամավորների Լեռնային Ղարաբաղի մարզային և Շահումյանի շրջանային խորհուրդների համատեղ նստաշրջանը հռչակեց Լեռնային Ղարաբաղի Հանրապետությունը (ԼՂՀ) նախկին ԼՂԻՄ և Շահումյանի շրջանի սահմաններում: