Նիկոլ Փաշինյանը գյուղատնտեսական ապրանքների արտահանման գործընթացում անհանգստացնող ազդակներ չի տեսնում

ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ։ Մաքսային անցակետերում գյուղատնտեսական ապրանքների արտահանման համար նախատեսված ընթացակարգերը սրբագրվել են այնպես, որպեսզի այդ գործընթացը հնարավորինս արագ տեղի ունենա։

«Արմենպրես»-ի հաղորդմամբ՝ այս մասին պարետատան նիստին հաջորդած ճեպազրույցի ժամանակ ասաց ՀՀ վարչապետ Նիկոլ Փաշինյանը։

«Մենք Վրաստանի և Ռուսաստանի մեր գործընկերների հետ մշտական կապի մեջ ենք և Վերին Լարսում էլ ունենք մաքսային ներկայացուցիչ։ Այս գործակցության շրջանակներում հույս ունեմ, որ ամեն ինչ կկազմակերպենք բարձր մակարդակով։ Ներկա պահին որևէ անհանգստացնող ազդակ չունենք»,- նշեց Փաշինյանը։

Կառավարությունը հունիսի 12-ին որոշում է կայացրել ՀՀ-ում 2020 թվականի մարտի 16-ին հայտարարված և մինչև հունիսի 13-ը երկարաձգված արտակարգ դրության ժամկետը հունիսի 13-ից՝ ժամը 17:00-ից երկարաձգել ևս 30 օրով՝ մինչև հուլիսի 13-ը՝ ժամը 17:00-ն ներառյալ:

Լիլիթ Դեմուրյան