ԱԽ քարտուղարն անդրադարձավ հակասություններ սերմանող ուժերի մասին վարչապետի հայտարարությանը
ԵՐԵՎԱՆ, 26 ՀՈՒԼԻՍԻ, ԱՐՄԵՆՊՐԵՍ: Հայաստանի Հանրապետության Անվտանգության խորհրդի քարտուղար Արմեն Գրիգորյանն անդրադարձավ վարչապետ Նիկոլ Փաշինյանի կողմից արված այն հայտարարությանը, թե Արցախում կան ուժեր, որոնք փորձում են հակասություններ սերմանել Հայաստանի և Արցախի միջև: «Արմենպրես»-ի փոխանցմամբ` հուլիսի 26-ին հրավիրված մամուլի ասուլիսում Գրիգորյանը նշեց, որ անվտանգության կառույցները զբաղվում են այդ ուժերին հայտնաբերելով:
«Այս հարցը, բնականաբար, մեր օրակարգում է: Ուշադիր հետևում ենք բոլոր գործընթացներին, փորձում ենք այնպես անել, որ հնարավորինս բացառենք որևէ նման ուղղությամբ զարգացումը: Եվ այս պահին բանակն ու անվտանգության ուժերն ամբողջովին պատրաստ են իրենց առջև դրված ցանկացած առաջադրանքի, և կարծում եմ` այս պահին այդ սպառնալիքը մինիմումի է հասցված»,- ասաց Գրիգորյանը:
Նրա խոսքով՝ Երևան-Ստեփանակերտ հարաբերություններն այս պահին շատ լավ վիճակում են: «Որոշ խնդիրներն արդեն անցյալում են: Շուտով Ստեփանակերտում կայանալու են համահայկական խաղերը, և ևս մեկ անգամ կարողանալու ենք ֆիքսել, որ հարաբերությունները նորմալ են»,- ասաց Գրիգորյանը:
Մայիսի 20-ին ՀՀ վարչապետ Նիկոլ Փաշինյանը Արցախի ժողովրդին կոչ արեց միանշանակ և աներկբա ոչ ասել, մերժել բոլոր այն ուժերին, որոնց գործունեությունն ուղղված է մեր ժողովրդի երկու հատվածների միջև հակասություններ սերմանելուն:
«Արցախի ժողովրդին կոչ եմ անում աջակցել միայն այն ուժերին, որոնք հանդես են գալիս Հայաստանի ժողովրդի եւ նրա լեգիտիմ ներկայացուցիչ կառավարությանն աներկբա աջակցության դիրքերից: Ակնհայտ է, որ կան նախկին կոռուպցիոն համակարգը ներկայացնող կոնկրետ ուժեր, որոնք փորձ են անում կյանքի կոչել իրենց կողմից նախկինում կիրառված բանաձեւը. այն է՝ տարաձայնություններ, հակասություններ եւ նույնիսկ թշնամանք հրահրել Արցախի և Հայաստանի ժողովրդի միջեւ՝ «Բաժանիր, որ տիրես» տրամաբանությամբ, նախկինում իրենց կողմից թույլ տրված կոռուպցիոն հանցագործությունները կոծկելու, արդարացնելու նպատակով: Չնայած բոլորիս ակնհայտ է, որ մեր երկրում գործած համակարգային կոռուպցիայից Արցախի մեր հայրենակիցները հաճախ ավելի շատ են տուժել, բայց այդ համակարգերի որոշ պաշտոնյաներ գործադրում են կոռուպցիոն կապերը՝ Արցախում Հայաստանի կառավարության և անձամբ վարչապետի դեմ ստահոդ քարոզչություն իրականացնելու համար»,- նշել է վարչապետը:
Բաժանորդագրվեք մեր ալիքին Telegram-ում