Ազգային պատկերասրահում բացվել է լեհական Ասիմետրիա պատկերասրահի «Այրված արխիվներ» ցուցադրությունը
ԵՐԵՎԱՆ, 25 ՄԱՅԻՍԻ, ԱՐՄԵՆՊՐԵՍ: Ազգային պատկերասրահում տեղի ունեցավ «Արմենիա Արթ Ֆեյր»-ի նոր ծրագրի՝ «Արթ Ուիքի» (Արվեստի շաբաթ) բացումը՝ լեհական Ասիմետրիա պատկերասրահի «Այրված արխիվներ» ցուցադրությունով:
«Արմենպրես»-ի հաղորդմամբ՝ ցուցադրության ժամանակ հիմնական շեշտը դրվում է Սերգեյ Փարաջանովի լուսանկարչական գործունեությանը:
ՀՀ մշակույթի փոխնախարար Տիգրան Գալստյանը նշեց, որ այս ցուցահանդեսը բարձրացնում է արխիվների և պատմամշակութային արժեք ներկայացնող գործերի ստեղծման ու ոչնչացման հարցը:
«Այս ցուցադրության մեջ հետաքրքիր կերպով մեկտեղվում են արարման և ավերման խորհուրդները: Ցուցադրությունը բաժանված է 3 կատեգորիաների՝ ոչնչացում (այրում), արխիվացում (պահպանում) և ստեղծագործում»,- նշեց Գալստյանը:
Երևանի Գյոթե Կենտրոնի ղեկավար, Մշակույթի փորձագետ Նաթիա Միքելաձե-Բախսոլիանին ասաց, որ 2018 թվականին իրենք «Արթ ֆեյր»-ի շրջանակներում հրավիրել են հետաքրքիր արվեստագետների և կազմակերպել են հանդիպումներ նրանց հետ:
«Այդ գեղեցիկ ավանդույթը շարունակելու ենք նաև այս տարի: Գյոթե կենտրոնը ներկայացնելու է «Die Grenze» (Սահմանը) ցուցադրությունը, որի ժամանակ անդրադարձ կլինի Եվրոպայի և Ասիայի աշխարհագրական և մշակութային սահմաններին»,- Երևանի Գյոթե Կենտրոնի ղեկավարը:
Արվեստի շաբաթվա ընթացքում ներկայացվելու է «Արվեստ և տեխնոլոգիա» ծրագիրը, որը կենտրոնանալու է արվեստի և մշակույթի ոլորտներում նոր տեխնոլոգիաների ազդեցության վրա:
Արվեստի շաբաթը հանրության համար բաց կլինի մայիսի 26-ից հունիսի 2-ը, երեքշաբթի-ուրբաթ, ժամը՝ 11:00-17:00, Ազգային պատկերասրահում: 2019 թվականին «Արմենիա Արթ Ֆեյր»-ի և «Արվեստի շաբաթ» մշակութային ծրագրի գլխավոր հովանավորն է «Ամերիաբանկ» ՓԲԸ-ն: Մայիսի 31-ին, Երևան Էքսպո կենտրոնում տեղի կունենա երկրորդ ամենամյա «Արմենիա Արթ ֆեյր»-ի հանդիսավոր բացումը: Հունիսի 1-2-ը ցուցահանդեսը բաց կլինի նաև քաղաքացիների համար:
Բաժանորդագրվեք մեր ալիքին Telegram-ում