ԵՐԵՎԱՆ, 3 ՄԱՅԻՍԻ, ԱՐՄԵՆՊՐԵՍ:  Լոնդոնի «Արսենալ»-ի գլխավոր մարզիչ Ունայ էմերին Եվրոպայի լիգայի կիսաեզրափակիչի պատասխան խաղը ևս կարևոր է համարում:

«Արմենպրես»-ի հաղորդմամբ` Էմերին այն կարծիքին էր, որ բարդ է լավ արդյունքի հասնել կիսաեզրափակիչի առաջին խաղում և թիմին հաջողվել է լավ արձագանքել առաջինը բաց թողած գնդակին:

««Վալենսիա»-ի հետ դիմակայությունը դեռևս 50/50 է: Իսպանական թիմը ֆիզիկապես ամուր ֆուտբոլիստներ ունի: Հիմա պետք է նախապատրաստվենք երկրորդ խաղին, որը ևս կարևոր է»,-ասել է Էմերին:

Լոնդոնում կայացած «Արսենալ»-«Վալենսիա» խաղում հաշիվը բացեցին իսպանական թիմի ֆուտբոլիստները: 11-րդ րոպեին «Վալենսիա»-ին առաջ մղեց Դյակաբին: Սակայն «զինագործներից» Լյակազեթը նախ 18-րդ, ապա 25-րդ րոպեներին գրավեց «Վալենսիա»-ի դարպասը և դուբլ ձևակերպեց: Երկրորդ խաղակեսի վերջնամասում «Արսենալ»-ը խփեց նաև երրորդ գնդակը: Այս անգամ աչքի ընկավ Օբամեյանգը: «Զինագործները» հաղթեցին 3:1 հաշվով: Հայաստանի ֆուտբոլի ազգային թիմի կիսապաշտպան Հենրիխ Մխիթարյանը «Արսենալ»-ի մեկնարկային կազմում չէր, սակայն փոխարինման դուրս եկավ 75-րդ րոպեին: