ԱԺ հանձնաժողովն ուսումնասիրելու է ՊՆ-ի կողմից զինծառայողի մահը ուշ հայտնելու պատճառները
ԵՐԵՎԱՆ, 11 ՓԵՏՐՎԱՐԻ, ԱՐՄԵՆՊՐԵՍ: ՀՀ Ազգային ժողովի Պաշտպանության և անվտանգության հարցերի մշտական հանձնաժողովը պատրաստվում է ուսումնասիրել հունվարի 1-ին սպանված պայմանագրային զինծառայող Էդգար Էդուարդի Գրիգորյանի մահը ՊՆ-ի կողմից ուշ հայտնելու դեպքը: «Արմենպրես»-ի փոխանցմամբ՝ այս մասին փետրվարի 11-ին Ազգային ժողովում լրագրողների հետ զրույցում ասաց հանձնաժողովի նախագահ Անդրանիկ Քոչարյանը:
«Հանձնաժողովը և ես հարցն անպայման առաջնահերթությամբ կուսումնասիրենք, և ընդհանրապես կհասկանանք՝ ինչ մեխանիզմների բացակայությունն էր, որ այսպիսի անորոշություն առաջացավ, որովհետև նախկինում, կարծես, եթե ուշանում էր մեկ-երկու օր, անմիջապես մեր պաշտպանական գերատեսչությունը տեղյակ պահում էր մեր կորուստների մասին»,- ասաց Քոչարյանը:
2019 թվականի հունվարի 1-ին՝ ժամը 04:00-ի սահմաններում, ՀՀ ՊՆ N զորամասի մարտական դիրքի պահպանության տեղամասում կրծքավանդակի շրջանում ստացած հրազենային վնասվածքով հայտնաբերվել է նույն զորամասի պայմանագրային զինծառայող Էդգար Էդուարդի Գրիգորյանը: Նա տեղափոխվել է Մեղրի ԲԿ, որտեղ ժամը 08:10-ին մահացել է:
Դեպքի առթիվ Քննչական կոմիտեում հարուցվել է քրեական գործ ՀՀ ՔՕ-ի 110-րդ հոդվածի 1 մասով՝ ինքնասպանության հասցնելը:
Բաժանորդագրվեք մեր ալիքին Telegram-ում