Ինդոնեզիայի Լոմբոկ կղզու գրեթե կես միլիոն բնակիչներ լքել են տները ստորգետնյա ցնցումների պատճառով
ԵՐԵՎԱՆ, 21 ՕԳՈՍՏՈՍԻ, ԱՐՄԵՆՊՐԵՍ: Ինդոնեզիայի իշխանությունները եւ հումանիտար կազմակերպությունները մոբիլիզացնում են ուժերը Լոմբոկ կղզու շրջանում հերթական երկրաշարժի հետեւանքով տուժածներին օգնություն ցույց տալու համար: Այդ մասին, ինչպես տեղեկացնում Է «Արմենպրես»-ը, օգոստոսի 21-ին հայտնել Է Սինգապուրի The Straits Times հրատարակությունը:
Վերջին տվյալներով՝ օգոստոսի 19-ին Լոմբոկ կղզում տեղի ունեցած նոր երկրաշարժն առնվազն 10 մարդու կյանք Է խլել: Դրա հետ մեկտեղ, ինչպես լրագրողներին հայտարարել Է Արտակարգ իրավիճակների գործակալության ներկայացուցիչը, «զոհերի թիվը շարունակում Է աճել, հետցնցումները շարունակվում են»:
Արտակարգ ծառայություններում մտահոգված են, որ պահպանվում Է պարենի, խմելու ջրի եւ պատսպարանների պակասն ավելի քան 430 հազար անձանց համար, որոնք հարկադրված են եղել լքելու իրենց տները: The Straits Times-ի տվյալներով՝ այդ շրջանում ավերված օբյեկտների վերականգնման արժեքը կկազմի շուրջ 480 միլիոն դոլար: Զանգվածային լրատվամիջոցները հիշեցնում են, որ հուլիսի 29-ին եւ օգոստոսի 5-ին Լոմբոկում տեղի են ունեցել ուժգին երկրաշարժեր, ընդ որում օգոստոսի 5-ի երկրաշարժը հանգեցրել Է շուրջ 480 մարդու մահվան, հաղորդել Է «Ինտերֆաքս»-ը:
Բաժանորդագրվեք մեր ալիքին Telegram-ում