ԵՐԵՎԱՆ, 27 ՆՈՅԵՄԲԵՐԻ, ԱՐՄԵՆՊՐԵՍ: Հայաստանում Եվրամիության պատվիրակության ղեկավար, դեսպան Պյոտր Սվիտալսկին կարծում է՝ օրերս Հայաստանի և Եվրամիության միջև ստորագրված գործընկերության համաձայնագիրն արտացոլում է Ղարաբաղյան հիմնահարցի կարգավորման շուրջ ԵՄ-ի և Հայաստանի միջև գոյություն ունեցող համաձայնության շատ բարձր մակարդակը: Այս մասին նա հայտարարեց նոյեմբերի 27-ին լրագրողների հետ հանդիպմանը: «Ձևակերպումները (խմբ. - ԼՂ հարցի կարգավորման առնչությամբ), որ կան համաձայնագրում, արտացոլում են Եվրամիության և Հայաստանի միջև ընդհանուր հայտարարի շատ բարձր մակարդակի լինելը»,- «Արմենպրես»-ի փոխանցմամբ՝ նշեց Պյոտր Սվիտալսկին:

Նրա խոսքով՝ համաձայնագիրը շատ հստակ փոխանցում է միտքը, որ ԵՄ-ն ամբողջապես կողմ է խնդրի խաղաղ կարգավորմանը, կողմնակից է Մինսկի խմբի ու համանախագահների աշխատանքին, և պատրաստ է նպաստել տարածաշրջանում վստահության վերականգնման գործընթացին: «ԵՄ-ն պատրաստ է, հստակ աջակցություն տրամադրելով, նպաստել վստահության կառուցման գործընթացին, ինչպես նաև հետհակամարտային շրջանի վերականգնողական գործողություններին: Մենք հավատում ենք Հայաստանի ու տարածաշրջանի զարգացման, ինչպես նաև Եվրոպական հարևանության կայունության հաստատման գործում այս հակամարտության խաղաղ կարգավորման կարևորությունը»,- հավելեց ԵՄ պաշտոնյան: 

Նոյեմբերի 24-ին Բրյուսելում ստորագրված ՀՀ-ԵՄ Համապարփակ և ընդլայնված գործընկերության համաձայնագրում շեշտվում է ՝ Լեռնային Ղարաբաղի հակամարտության խաղաղ և տևական կարգավորման համար Հայաստանի Հանրապետության հանձնառության կարևորությունը և ԵԱՀԿ Մինսկի խմբի համանախագահների կողմից վարվող բանակցությունների շրջանակներում այդ կարգավորմանը հնարավորինս շուտ հասնելու անհրաժեշտությունը. ընդունելով նաև ՄԱԿ-ի կանոնադրության մեջ և ԵԱՀԿ Հելսինկյան եզրափակիչ ակտում ամրագրված նպատակների և սկզբունքների հիման վրա այդ կարգավորմանը հասնելու անհրաժեշտությունը, մասնավորապես, այն նպատակների և սկզբունքների, որոնք առնչվում են ուժի կիրառումից կամ դրա սպառնալիքից խուսափելուն, պետությունների տարածքային ամբողջականությանը և ժողովուրդների իրավահավասարությանը ու ինքնորոշման իրավունքին և արտացոլված են ԵԱՀԿ 2008 թվականի նախարարների խորհրդի 16-րդ հանդիպումից ի վեր ԵԱՀԿ Մինսկի խմբի համանախագահության շրջանակներում արված բոլոր հայտարարություններում. նշելով նաև կարգավորման այս գործընթացին աջակցելու՝ Եվրոպական միության հայտարարված հանձնառությունը: